Rossiya prezidenti Vladimir Putin 7-oktabr — tug‘ilgan kunini ish joyida o‘tkazadi. Bu haqda Kreml rasmiy vakili Dmitriy Peskovga tayanib, “TASS” xabar berdi.
Peskovning ta’kidlashicha, shu kuni Rossiya rahbari uchun bir qancha tadbirlar rejalashtirilgan. Putin 7-oktabr, juma kuni o‘zining 70 yoshini qarshilaydi.
“Putin tug‘ilgan kunini ish joyida o‘tkazadi, ish tadbirlari rejalashtirilgan”, — dedi Peskov.
Avvalroq Ramzan Qodirov Chechenistonda Putinning tug‘ilgan kuni munosabati bilan ommaviy tadbirlar tashkil etilgani haqida xabar qilgandi. 7-oktabr kuni Chechenistonda Putin nomidagi dzyudo olimpiya mashg‘ulotlari markazi, shuningdek, “Minutka” ko‘p funksiyali majmua ochiladi. Bundan tashqari, Rossiya prezidentining 70 yoshi sharafiga ko‘plab sport musobaqalari o‘tkaziladi.
Vladimir Putin 1952 yil 7-oktabrda Leningradda tug‘ilgan. U oilada uchinchi o‘g‘il edi, lekin u tug‘ilishidan oldin ikki akasi — Albert va Viktor vafot etgan.
Izoh (0)