Buxoroda fuqaro 220 ming rublni so‘mga noqonuniy ayirboshlayotganda qo‘lga tushdi

O‘zbekistonning bir qator hududlarida valyuta qimmatliklarining noqonuniy muomalaga kiritilishining oldi olindi.

Bosh prokuratura huzuridagi departamentning Xorazm viloyatining Yangibozor tumani bo‘limi tomonidan o‘tkazilgan tezkor tadbirda, Bog‘ot tumani dehqon bozori atrofida valyuta ayirboshlash bilan shug‘ullanib kelgan X.O. fuqaro M.ga 4 200 AQSH dollarini 46,6 million so‘mga sotgan vaqtida ashyoviy dalillar bilan ushlangan.

Departamentning Toshkent viloyatining Bekobod shahar bo‘limi tomonidan o‘tkazilgan tezkor tadbirda, shahar dehqon bozori atrofida valyuta ayirboshlash bilan shug‘ullanib kelgan (muqaddam Jinoyat kodeksining 177-moddasi bilan sudlangan) A.R. fuqaro R.ga 3 550 AQSH dollarini 39,4 million so‘mga sotgan vaqtida ashyoviy dalillar bilan ushlangan.

Shu kabi, Departamentning Buxoro viloyat boshqarmasi tomonidan IIB xodimlari bilan hamkorlikda o‘tkazilgan tezkor tadbirda, Buxoro shahar savdo majmuasi atrofida valyuta ayirboshlash bilan shug‘ullangan (muqaddam Jinoyat kodeksining 177-moddasi bilan sudlangan) U.Ya. fuqaro D.ga 220 ming Rossiya rublini 38,5 million so‘mga sotgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.