Farg‘ona viloyatida o‘quvchilari fan olimpiadalarida yuqori natijaga erishgan hamda samarali faoliyat yuritib kelayotgan bir guruh o‘qituvchilarga viloyat hokimining maxsus ustamasi beriladi. Bu haqda o‘qituvchi va murabbiylar kuni munosabati bilan o‘tkazilgan tantanali tadbirda ma’lum qilindi, deb xabar bermoqda “Daryo” muxbiri Azizjon Ermatov.
2021-yil yakunlariga bag‘ishlab o‘tkazilgan Xalq deputatlari viloyat Kengashi sessiyasida Xayrullo Bozorov tomonidan eng yaxshi ko‘rsatkichlarga erishgan maktab o‘qituvchilari uchun viloyat hokimining maxsus ustamasi joriy etilishi ma’lum qilingandi.
Shundan so‘ng viloyat xalq ta’limi boshqarmasi tomonidan o‘quvchilari xalqaro, respublika va viloyat fan olimpiadalarida yuqori natijalarga erishgan hamda samarali faoliyat yuritib kelayotgan 122 nafar fan o‘qituvchilari aniqlangan.
O‘qituvchi va murabbiylar kuni arafasida ushbu faol pedagoglarga oylik ish haqining 20 foizidan 100 foizigacha miqdorda viloyat hokimining ustamasi to‘lab berilgan.
Ta’kidlanishicha, har chorak yakuni bo‘yicha eng yaxshi ko‘rsatkichlarga erishgan 200 nafar o‘qituvchiga viloyat hokimining maxsus ustamasi berib boriladi.
Izoh (0)