Uzbekistan Airports parvozlarni kuzatish uchun Telegram bot ishga tushirdi

Uzbekistan Airports test rejimida Telegram bot ishga tushirdi. Bu haqda kompaniya matbuot xizmati xabar bermoqda.

Ta’kidlanishicha, ushbu Telegram bot real vaqt rejimida barcha xalqaro va ichki reyslar, shuningdek, jadvaldagi o‘zgarishlar haqida ma’lumot berib boradi.

Botni ishga tushirgan har bir foydalanuvchi mavjud ro‘yxatdan aeroport, terminal, uchib ketish yoki uchib kelish va o‘ziga kerakli yo‘nalishni tanlashi mumkin.

Shundan so‘ng, bot parvoz haqidagi ma’lumotlarni ko‘rsatadi: uchish vaqti, reys raqami, parvoz holati va yo‘nalishi, tashuvchi aviakompaniya va ro‘yxatdan o‘tish ma’lumotlari.

Ma’lumotlarga ko‘ra, yaqin kelajakda funksionallikni kengaytirish rejalashtirilmoqda.

Parvozlar holatining o‘zgarganligi, poytaxt aeroporti terminallari o‘rtasida qatnovchi avtobuslar jadvali, shuningdek, yuqori darajadagi komfort zallari uchun masofaviy to‘lovlarni amalga oshirish imkoniyati joriy qilinadi.

Telegram bot rus va o‘zbek tillarida faoliyat yuritmoqda.