Farg‘ona va Toshkent viloyatlarida tabiiy resurslardan noqonuniy foydalanib kelgan shaxslar aniqlandi. Bu haqda Iqtisodiy jinoyatlarga qarshi kurashish departamenti xabar berdi.
Ta’kidlanishicha, Bosh prokuratura huzuridagi departamentning hududiy bo‘limlari tomonidan tergovga qadar tekshiruvlar o‘tkazilgan. Ularda tabiiy gaz tarmog‘idan noqonuniy foydalanib, davlat va jamiyat manfaatlariga juda ko‘p miqdorda zarar yetkazish holatlari fosh etilgan.
Jumladan, Quvasoy shahrida “Q.” MCHJ rahbari Sh.K. tomonidan pishiq g‘isht ishlab chiqarish faoliyati davomida 2,4 milliard so‘m, Uchko‘prik tumanida “A.” MCHJni norasmiy boshqarib kelgan A.E. tomonidan 2 milliard so‘m hamda Bo‘stonliq tumanida ohak ishlab chiqaruvchi yashirin sexlar tashkil etgan X.N.tomonidan davlat va jamiyat manfaatlariga 582,4 million so‘m zarar yetkazilgani aniqlangan.
Mazkur holatlar yuzasidan Jinoyat kodeksining 28, 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)