Toshkent shahri Sergeli tumanida fuqaroning uyida nasha ekilgani va marixuana giyohvandlik vositasi borligi ma’lum bo‘ldi. Bu haqda shahar ichki ishlar bosh boshqarmasi “Daryo”ga xabar berdi.
Qayd etilishicha, shaharda giyohvandlik vositalari saqlanishi, sotilishi, yetishtirilishga qarshi keng qamrovli tadbirlar olib borilmoqda. Jumladan, 20-sentabr kuni IIBB JQB hamda Sergeli tumani IIO FMB JQB xodimlari tomonidan Nurafshon ko‘chasida o‘tkazilgan tezkor qidiruv tadbirlari davomida 1972-yilda tug‘ilgan R. ismli shaxsning xonadoni xolislar bilan ko‘zdan kechirilgan.
Toshkent shahri IIBB JQBning bergan ma’lumotiga ko‘ra, bu shaxs xonadonida jami 13 tup nasha o‘simligini ekib, parvarishlab kelayotgani, shuningdek, taxminan og‘irligi 200 gramm marixuana giyohvandlik vositalari aniqlanib, ashyoviy dalil sifatida olingan.
Shahar IIBB xodimlari tomonidan olingan barcha daliliy ashyolar o‘rnatilgan tartibda ekspertizaga topshiriladi va natijasiga qarab qonuniy qaror qabul qilinadi. Poytaxt ichki ishlar organlari tomonidan bu kabi tezkor tadbirlar davom etmoqda.
Izoh (0)