Qonunchilik palatasi deputatlari “Yo‘l harakatini tashkil etish to‘g‘risida”gi qonunni birinchi o‘qishda qabul qildi

20-sentabr kuni Oliy Majlisi Qonunchilik palatasining navbatdagi majlisi bo‘lib o‘tdi. Majlis Qonunchilik palatasining YouTube’dagi kanali orqali jonli efirga uzatildi.

Qayd etilishicha, majlisda “Yo‘l harakatini tashkil etish to‘g‘risida”gi qonun loyihasi birinchi o‘qishda ko‘rib chiqilgan.

Ta’kidlanishicha, bugungi kundagi yo‘llarning holati o‘sib borayotgan transport vositalarining tirbandliklarsiz harakatlanishini ta’minlashga javob bermaydi. Yo‘l harakati ishtirokchilari bo‘lgan transport vositalari yo‘lovchilari, piyoda va velosiped haydovchilar uchun yo‘l harakatini tashkil etish to‘g‘ri va tizimli yo‘lga qo‘yilmagan.

Taklif etilayotgan qonun loyihasida yo‘l harakatini tashkil etishning asosiy prinsiplari, yo‘l harakatini tashkil etish sohasidagi davlat boshqaruvi, avtomobil yo‘li egasining huquq va majburiyatlari, yo‘l harakatini tashkil etishga qo‘yiladigan umumiy talablar, yo‘l harakati monitoringini olib borish, yo‘l harakatini tashkil etish samaradorligini ta’minlash kabi yo‘nalishlar belgilab qo‘yilmoqda.

Qonun loyihasining qabul qilinishi yo‘l harakatini tashkil etish bo‘yicha Davlat boshqaruvi va vakolatli organlar o‘rtasida samarali hamkorlik qilish tizimlarini yaratish, yo‘l harakatini tashkil etish sohasidagi faoliyatning tizimli va kompleks boshqarilishi natijasida yo‘l harakatini tashkil etish samaradorligini oshirish hamda takomillashtirish, yo‘l harakati xavfsizligi yuqori darajaga ko‘tarishga xizmat qiladi.

Majlisda qonun loyihasi deputatlar tomonidan qabul qilingan.