Andijon shahrida Cobalt haydovchisi YPX xodimining talablariga bo‘ysunmasdan, uni mashina kapotida sudrab ketdi. Holat aks etgan video ijtimoiy tarmoqlarda tarqaldi.
Viloyat IIB matbuot xizmatining ma’lum qilishicha, voqea 15-sentabr kuni soat 21:58 da Andijon shahar Milliy tiklanish va Amir Temur shohko‘chalari kesishmasida yuz bergan. Shu yerda xizmat olib borayotgan YPX inspektori undan avvalgi chorrahada xizmat olib borayotgan inspektordan Cobalt haydovchisi K.V. mashina to‘xtamay ketib qolgani haqida olgan xabarga ko‘ra uni to‘xtashish chorasini ko‘rgan.
Haydovchi uning qonuniy talablariga bo‘ysunmay, mashinani uning ustiga bostirib haydab ketgan va o‘zini olib qochishga ulgurmagan YPX xodimi mashina kapoti ustiga osilib qolgan. Haydovchi joyidan keskin qo‘zg‘alishi hamda xavfli manyovr bilan o‘ng tomonga keskin qayrilishi oqibatida inspektor kapotdan tushib ketgan. Oqibatda uning qo‘l-oyog‘i shilingan, jezl va aloqa vositalari sinib, shikastlangan.
Fuqaro K.V.ga nisbatan Ma’muriy javobgarlik to‘g‘risidagi kodeksning 194-moddasiga (ichki ishlar organlari xodimining qonuniy talablarini bajarmaslik) asosan ma’muriy bayonnoma rasmiylashtirilib va avtomashina vaqtinchalik jarima maydoniga joylashtirilgan.
Ayni paytda holat yuzasidan IIV SHXBB Andijon viloyati bo‘yicha boshqarmasi hamda Andijon shahar prokuraturasi tomonidan surishtiruv harakatlari olib borilmoqda.
Izoh (0)