Farg‘ona viloyatining Oltiariq tumanidagi bog‘chada 40 dan ortiq bola ovqatdan zaharlangani haqida xabarlar tarqalgandi. Viloyat maktabgacha ta’lim boshqarmasi mazkur xabarlar yolg‘on ekanligi, bolalarda ovqatdan zaharlanish alomatlari mavjud emasligini ma’lum qildi.
Raddiyada aytilishicha, 14-sentabr kuni Oltiariq tumani Tibbiyot birlashmasi SHTTYO qabul bo‘limi bolalar posti va Yuqumli kasalliklar bo‘limiga Oltiariq tumani “Beruniy” MFY, A.Obidjon ko‘chasi 125-uyda joylashgan 39-sonli Davlat maktabgacha ta’lim tashkilotida tarbiyalanayotgan (3 yoshdan 5 yoshgacha bo‘lgan) jami 8 nafar bola isitma, qayt qilish, ich ketishi, umumiy holsizlik shikoyatlari bilan kech soat 18:00 da ota-onalari tomonidan olib kelingan.
Bolalar tuman Yuqumli kasalliklar bo‘limida davolovchi shifokorlar tomonidan tibbiy ko‘rikdan o‘tkazilib, dastlabki alimentar diareya birlamchi tashxisi qo‘yilgan va ular Yuqumli kasalliklar bo‘limiga yotqizilgan. Hozirda bolalarning umumiy holati qoniqarli.
Oltiariq tuman Tibbiyot birlashmasi boshlig‘i SH.Buzrukov imzosi bilan taqdim etilgan ma’lumotnomada qayd etilishicha, bolalarning axlatidan, qusuq massalaridan va ovqat qoldiqlaridan viloyat va tuman SEO va JSB bakteriologik tahlil uchun namunalar olingan.
“Bolalarda ovqatdan zaharlanish alomatlari mavjud emas. Shuningdek, ushbu bemorlar bilan bir guruhda bo‘lgan 26 nafar bola statsionar sharoitda nazoratga olingan bo‘lib, bolalar sog‘lig‘ida kasallik alomatlari yo‘q. Tuman Yuqumli kasalliklar shifoxonasida davolanayotgan bemorlarga malakali tibbiy xizmat ko‘rsatilmoqda”, — deyiladi Farg‘ona viloyati MTB xabarida.
Viloyat prokuraturasi mazkur holat yuzasidan hozirda Oltiariq tumani prokuraturasi tomonidan tergovga qadar tekshiruv o‘tkazilayotganini, ekspertiza tekshiruvi uchun tegishli namunalar olinib, sud-tibbiy ekspertizalari tayinlanganini ma’lum qilgandi. Tekshiruv viloyat prokuraturasi tomonidan nazoratga olingan.
Izoh (0)