“Daryo”da Andijon viloyatining Oltinko‘l tumanidagi maktab o‘qituvchilari majburiy mehnatga jalb qilingani haqida xabar berilgandi. Keyinchalik mazkur holat tuman hokimligi nazoratiga olingani ma’lum bo‘ldi.
Oltinko‘l tuman hokimligi tomonidan ushbu holat yuzasidan qo‘shimcha ma’lumot berildi. Ma’lum qilinishicha, holat Davlat mehnat huquq inspeksiyasi tomonidan o‘rganilgan. O‘rganish davomida majburiy mehnatga yo‘l qo‘yganlik holati o‘z tasdig‘ini topmagan.
Biroq Mehnat kodeksining 125-moddasi “Ish beruvchi har bir xodimning haqiqatda ishlagan ish vaqtini, shu jumladan, ish vaqtidan tashqari ishlagan vaqtini o‘z vaqtida aniq hisobga olib borishi shart”, deb qayd etilgan talablari buzilganlik holati aniqlandi, — deyiladi munosabatda.Qayd etilishicha, 29-avgust kuni maktabdagi mehnat vazifasini bajarmagan va kelishuv asosida ish haqi evaziga sinf xonasini ta’mirlagan xodimga tabel ishlaganligi aniqlangan.
Aniqlangan holat yuzasidan maktab direktoriga nisbatan Ma’muriy javobgarlik to‘g‘risidagi kodeksning 49-moddasi 1-qismiga muvofiq bazaviy hisoblash miqdorining 5 baravari miqdorida jarima jazosi tayinlangan.
Eslatib o‘tamiz, majburiy mehnatga jalb qilingan o‘qituvchilar “Daryo”ga shikoyat qilib, “Ko‘pchilik o‘qituvchilar maktab direktoriga qarshi chiqolmaydi. Agar kimdir aytganini qilmasa, uning dars soatini kamaytirishga, hujjatlaridan kamchilik topishga kirishib ketadi”, — degandi.
Bundan avvalroq Oltinko‘l tumanidagi 1-sonli maktab o‘quvchilari majburiy mehnatga jalb qilingani, voqea ortidan maktab direktori hayfsan olgani ma’lum qilingandi.
Izoh (0)