Nasibullayev 4 ta o‘yinga chetlatildi, Asimov esa ogohlantirildi. O‘zbekistonlik qator futbol hakamlari jazoga tortildi

O‘zbekiston futbol assotsiatsiyasining (O‘FA) Hakamlar qo‘mitasida yig‘ilish bo‘lib o‘tdi. Unga ko‘ra, qator hakamlar jazoga tortildi.

Shavkat Nasibullayevning O‘zbekiston Kubogi chorak finali doirasida kechgan “So‘g‘diyona” — “Qizilqum” uchrashuvidagi (1:1, penaltilar — 4:3) harakatlari qoniqarsiz baholangan. Hakam shu bois to‘rtta o‘yinga diskvalifikatsiya qilingan va jarimaga tortilgan.

Shuningdek, mazkur uchrashuvda zaxira hakami vazifasini o‘tagan Ravshan Abduvohidov uchta o‘yinga chetlatilgan va jarimaga tortilgan.

“Nasaf” va “Lokomotiv” o‘rtasidagi kubok chorak finali o‘yinida (1:0) ishlagan hakamlar ham sanksiyaga uchragan. Uchrashuv bosh hakami G‘ayrat Jo‘rayev uchta o‘yinga chetlatilgan hamda unga nisbatan jarima qo‘llanilgan. Uning yordamchilari esa ogohlantirish olgan va jarimaga tortilgan.

Superliga doirasidagi “Bunyodkor” — “Neftchi” uchrashuvi (1:2) bosh hakami Aziz Asimov ogohlantirish olgan. Mazkur o‘yin yordamchi hakami Artyom Kalinin esa ikkita o‘yinga chetlatilib, jarimaga tortilgan.

Diskvalifikatsiyalar Superliga va O‘zbekiston Kubogi o‘yinlari uchun amal qiladi.