AQSH “Rossiyaning yashirincha ta’siri” haqidagi ma’ruzasini oshkor etdi

AQSH o‘z razvedkasining Rossiya tomonidan boshqa mamlakatlarning “yashirincha siyosiy moliyalashtirilishi” haqidagi ma’ruzasini qisman oshkor qildi, deb yozadi “RBK”. Bu haqda brifingda Amerika ma’muriyatining yuqori mansabli vakili ma’lum qildi.

Mansabdorning so‘zlariga ko‘ra, AQSH razvedkasi aniqlashicha, 2014-yildan buyon Rossiya chet eldagi ta’sirini kuchaytirishga 300 million dollardan ortiq mablag‘ sarflagan. Pullar 20 dan ziyod mamlakatdagi xorij partiyalari, siyosatchilari va amaldorlariga yo‘naltirilgan, dedi u. Aynan qaysi mamlakatlar haqida gap borayotganiga AQSH prezidenti ma’muriyati aniqlik kiritmadi.

Rossiya hukumati boshqa mamlakatlar ichki ishlariga aralashganlik haqidagi ayblovlarni ko‘p bora rad etib kelgan. “Bilasizki, Rossiya o‘zining ichki ishlariga aralashuvni hech qachon ma’qullamagan va o‘zi ham hech qachon bunday qilmaydi, shunday holat yuz berganida, qat’iyan qarshi chiqadi”, — degan edi prezident matbuot kotibi Dmitriy Peskov.

AQSH Rossiyani saylovlarga aralashishda ham ayblagan. Iyun oyida CNN Vashington noyabr boshida bo‘lib o‘tadigan vakillar palatasi va senatga saylovlarga aralashishi mumkinligidan xavotirda ekanini ma’lum qilgandi.

Peskov bunday ayblovlarni asossiz deb atagan va Vashington tomonidan berilayotgan shunday xabarlarni “qaysarlik vasvasasi” bilan izohlagan edi. “Saylov kampaniyasi chog‘ida barcha Vashington siyosatchilarining yozuv stoli qizil burchagida Rossiya xaritasi turganini ko‘ryapmiz”, — degan edi prezident matbuot kotibi 2016-yildayoq.