O‘zbekistonda yil boshidan beri 50 mingga yaqin odam ipoteka kreditlarini olgan

Markaziy bank 2022-yilning 8 oyida aholiga ajratilgan ipoteka kreditlari bo‘yicha ma’lumot berdi.

Unga ko‘ra, aholiga ajratilgan ipoteka kreditlari qoldig‘i 2017-yilga qaraganda 5,6 barobarga ko‘payib, joriy yilda 42,5 trln so‘mga yetgan. 

Toshkent shahri 2022-yilda ajratilayotgan ipoteka kreditlari bo‘yicha qolgan viloyatlarga qaraganda bir necha bor oldinda bormoqda — 2,78 trln so‘m. Bu borada 771 mlrd so‘m ko‘rsatkich bilan Farg‘ona keyingi o‘rinda qayd etilgan. 

Kreditlarning 78 foizi yangi qurilgan — birlamchi bozordagi uylarga ajratilgan. Yil boshidan beri 50 mingga yaqin fuqaroga ipoteka kreditlari berilgan. 

Kredit rasmiylashtirayotgan mijozlar 48 344 nafar bo‘lsa, ularning 59 foizini erkaklar, 41 foizini ayollar tashkil etgan. Ipoteka kreditlarining asosiy qismini 31-50 yosh oralig‘idagi fuqarolar olmoqda — 70 foiz. 

Yil boshidan beri ipoteka kreditlarining moliyalashtirish manbalari:

• Moliya vazirligi — 6,7 trln so‘m;
• Bank o‘z mablag‘lari —  2,3 trln so‘m;
• Ipotekani qayta moliyalashtirish manbalari — 114,3 mlrd so‘m.

Yangi tartib doirasida ajratilgan ipoteka kreditlari esa 2022-yilda deyarli o‘zgarmagan — 17,2 foiz.