Qozog‘iston Senati (parlament yuqori palatasi) raisi Maulen Ashimbayev respublikada yagona yetti yillik prezidentlik muddati joriy etilishi tarafdori ekanini aytdi. Bunday taklif sentabr boshida mamlakat prezidenti Qosim-Jo‘mart To‘qayev tomonidan kiritilgandi.
“Mamlakatimiz fuqarosi bir muddatga prezident etib saylanishi uchun yetti yillik prezidentlik muddati joriy etilishi tarafdoriman. Bu mamlakatimizda siyosiy raqobatni rivojlantirish imkonini beradi va biz muvozanatli raqobatbardosh demokratik siyosiy tizimni shakllantirish yo‘lida jiddiy qadam tashlaymiz”, — dedi Ashimbayev.
Uning so‘zlariga ko‘ra, bu norma Qozog‘istonda hokimiyatning bir shaxs qo‘lida to‘planishini yanada cheklaydi.
“Yetti yil – saylovoldi dasturini amalga oshirish, aholiga berilgan va’dalarni bajarish, mamlakat uchun bir qancha yirik loyihalarni amalga oshirish uchun yetarli muddat. Bu norma Qozog‘istondagi siyosiy islohotlar dasturining bir qismi. U hokimiyatni monopoliyadan chiqarish yo‘lida yana bir muhim qadam tashlash imkonini beradi”, — deb tushuntirdi Senat raisi.
1-sentabr kuni Qosim-Jo‘mart To‘qayev mamlakat xalqiga murojaatnomasida joriy yilning kuzida navbatdan tashqari prezidentlik saylovlari hamda 2023-yilning birinchi yarmida parlament va maslahatlar (mahalliy vakillik organlari)ga navbatdan tashqari saylovlar o‘tkazilishini ma’lum qildi.
Davlat rahbari, shuningdek, prezident vakolatlarini hozirgi besh yillik ikki muddat emas, balki yetti yillik yagona muddat bilan cheklashni taklif qildi. U tegishli tashabbusni saylovdan so‘ng parlamentga ko‘rib chiqish uchun kiritishini bildirdi. Qozog‘istonda navbatdagi prezidentlik saylovi 2024-yilda bo‘lib o‘tishi kerak edi.
Izoh (0)