“So‘g‘diyona” bosh murabbiyi Ulug‘bek Baqoyev OFK Kubogi mintaqalararo yarim finali doirasida “Istern”ga qarshi kechgan o‘yindagi (1:0) g‘alabadan keyin o‘z fikrlari bilan o‘rtoqlashdi.
O‘yin haqidaSo‘g‘diyona jamoasi OFK Kubogi hududlararo finalida 7-sentabr kuni bo‘lib o‘tadigan “Mohun Bagan” (Hindiston) — “Kuala Lumpur Siti” (Malayziya) bahsi g‘olibi bilan kuch sinashadi. Bellashuv 5-oktabr kuni Jizzax shahrida bo‘lib o‘tishi rejalashtirilgan.G‘alaba bilan xalqimizni, jizzaxlik muxlislarni tabriklayman. Raqib juda tartibli himoyalandi va qarshi hujumda o‘ynadi. Bizda esa nimadir o‘xshadi, nimadir yo‘q. Ba’zi vaziyatlarda tezroq harakat qilish kerak edi, ammo jismoniy holat baribir o‘z so‘zini aytdi. Nima bo‘lgan taqdirda ham g‘alaba qozondik va keyingi bosqichga chiqdik.
Tanaffusdan keyin o‘yinga kiritilgan o‘zgarishlar haqida
Bu o‘yinda raqibdan kelib chiqib asosan qanotlardan hujum qildik. Yakunda aynan shu yo‘l bilan gol urdik.
Tanaffus vaqtida ortiqcha gaplar aytmadik. Barcha o‘yinning muhimlik darajasini tushunib turgandi. Kichik xatolarimizni to‘g‘riladik va bir nechta o‘zgarishlar yordamida g‘alaba qozondik.
Zich taqvim haqida
Uchta frontda kurashni davom ettiryapmiz. Bu qiyin ammo katta tajriba. Bo‘lajak har bir o‘yinga, qaysi musobaqa bo‘lishidan qat’i nazar, xuddi finaldek tushamiz.
Xalqaro maydondagi tajribasizlik borasida
OFK Kubogida yarim finalga chiqdik. Futbolchilarning ko‘pi xalqaro musobaqalarda ilk bor o‘ynamoqda. Ular uchun bu katta natija hisoblanadi. Xalqaro o‘yinlar orqali kelajakda milliy terma jamoada o‘ynashga va legioner bo‘lib to‘p tepishga intilishadi. Ularning har biriga bugungi o‘yin uchun rahmat.
Ulug‘bek Baqoyev, “So‘g‘diyona” bosh murabbiyi
Izoh (0)