Gollivud va Bollivud yulduzlari bayram tadbirlarida, reklama roliklarida, tug‘ilgan kunida yoki boshqa sabab bilan millionlab muxlislarning qalbidan joy olgan multfilm, kinokartinalardagi obrazlarda ko‘rinish beradi. Xuddi shunday o‘zbek shou-biznesining ayrim vakillari ham turli sabablarga ko‘ra jahon kinosidagi mashhur obrazlarni gavdalantirgan.
Parizoda — Julyetta obrazi
Mahoratli raqqosa Parizoda millionlab muxlislarning qalbidan joy olgan yozuvchi Uilyam Shekspirning “Romeo va Julyetta” asari qahramoni Julyetta obraziga kirgan. U shu asar asosida suratga olingan filmda aytilgan mashhur she’rni ham o‘qigan. Parizodaning libosi va tashqi ko‘rinishi bir qarashda Julyettani eslatadi.
Jahongir Otajonov — Joker
Xonanda Jahongir Otajonov Ahror Usmonovning “O‘ynasin” nomli taronasini yangicha uslubda ijro etgan va musiqaga ishlangan klipni muxlislariga taqdim etgan. Ushbu klipda u mashhur obrazlardan biri Jokerni gavdalantirgan. “O‘ynasin” taronasiga ishlangan klip YouTube’da uch millionga yaqin marotaba ko‘rilgan.
Shohruxxon — Terminator
Bir qancha xit taronalar ijrochisi Shohruxxon “TikTok” nomli taronasiga suratga olingan klipda insonlarga baxt ulashuvchi robot, ya’ni Terminator obrazini gavdalantirgan. Ushbu klip YouTube’da ikki milliondan ortiq ko‘rishlar soniga ega.
Baby Mohi — Barbi
Instagram sahifasida bir milliondan ortiq obunachiga ega bo‘lgan Baby Mohi to‘yida Barbi obraziga kirgan. Uning libosi va makiyajini mashhur stilist Azamat yaratgan. Instablogerning to‘yidagi ko‘rinish Barbini eslatadi.
Sevinch Mo‘minova — Malika Budur
Mahoratli xonandalar Sevinch Mo‘minova va Sardor Mamadaliyev “Dubay” nomli taronasiga ishlangan videoklipni muxlislariga namoyish etgan. Ushbu klipda Sevinch Mo‘minova malika Budur obrazini ijro etgan. “Dubay” taronasiga ishlangan klip YouTube’da ikki milliondan ortiq marotaba ko‘rilgan.
Afruza — Malvina
“The cover up” loyihasi ishtirokchisi Afruza “Zo‘r TV” telekanalining Yangi yil dasturi uchun suratga olingan “Qor malikasi” kinofilmida “Buratino” multfilmidagi Malvina rolini ijro etgan. Xonanda bu obrazida “Armon” nomli taronasini ijro etgan.
Nigora — Kruella
“Oybek va Nigora” duetining a’zosi Nigora “Sevimli” telekanalining “Kim ekan” shousida Kruella obrazini gavdalantirgan. Ushbu shouda qatnashchilar niqob ostiga yashiringan insonning kim ekanini topishi kerak bo‘ladi. Qatnashchilar Kruella niqobi ostida Nigora yashiringanini topa olmagan.
Shahzoda Muhammedova va uning qizi — Barbi obrazi
Aktrisa, dizayner Shahzoda Muhammedova qizi Milananing tug‘ilgan kunida Barbi obraziga kirgan. Tug‘ilgan kunga aktrisaning yaqin insonlari tashrif buyurgan. Milana va Shahzoda Muhammedovaning libosi pushti rangda bo‘lgan. Tug‘ilgan kunga tashrif buyuruvchi insonlarga maxsus taklifnomalar tarqatilgan va ular ham oq yoki pushti rangli libos kiyishi kerak bo‘lgan.
Sitora Farmonova — “Kavkaz asirasi” Nina
Aktrisa Sitora Farmonova ko‘plab tomoshabinlarning qalbidan joy olgan, 1967-yilda suratga olingan “Kavkaz asirasi” filmidagi Nina obrazini ijro etgan. Filmning asl variantida esa bu rolni mashhur rus aktrisasi Natalya Varley gavdalantirgan. O‘zbekcha talqindagi videorolikda Sitora Farmonovaning partnyori, ya’ni Shurik obrazini “Dizayn” jamoasining a’zosi Dilshod Musabekov ijro etgan.
Shahlo Zoirova va Anjela Esimbetova — “Kavkaz asirasi” Georgiy Vitson va Yevgeniy Morgunov ijro etgan rollar
“Bravo” kulgi jamoasining a’zosi Shahlo Zoirova va aktrisa Anjela Esimbetova dugonalarining tug‘ilgan kuniga “Kavkaz asirasi” filmi qahramonlari obrazida borgan. Videorolikda Shahlo Zoirova — Georgiy Vitson va Anjela Esimbetova — Yevgeniy Morgunovning “Kavkaz asirasi”dagi yaratgan obrazida namoyon bo‘lgan.
Azoda — Barbi obrazi
Instabloger, tiktoker Azoda tug‘ilgan kunida mashhur Barbi obraziga kirgan va shu obrazda tushgan video, suratlarini Instagram’dagi sahifasiga joylashtirgan. Azodani shou-biznes olamining taniqli vakillari tug‘ilgan kuni bilan tabriklagan.
Mavzuga doir:
- Durdona Qurbonova va Feruza Normatova, Shahzod Sultonov va Shohrux Hamdamov: Jiddiy kelishmovchilik sabab bir filmda suratga tushishni istamaydigan aktyor va aktrisalar (video).
- Muxlisni siltab tashlagan Shohjahon Jo‘rayev, tomoshabinga tarsaki tushirgan Alisher Uzoqov: San’atkorlarni qanday holatlar asabiylashishga majbur qiladi? (video).
- Aziza Niyozmetova, Hoshim Arslonov, Jamshid Zokirov va saratondan vafot etgan boshqa o‘zbekistonlik san’atkorlar (foto).
- Bo‘yni yirtilgan, oyog‘i singan: Suratga olish jarayonlarida jarohat olgan o‘zbek shou-biznesi vakillari (video).
Izoh (0)