AQSH Davlat departamenti vakili O‘zbekistonda gender tenglik borasidagi ishlarni yuqori baholadi

AQSH Davlat departamenti vakili xotin-qizlar va gender tenglik borasidagi ishlarni yuqori baholadi, deb xabar bermoqda Senat matbuot xizmati.

Ma’lum qilinishicha, 30-avgust kuni Oliy Majlis Senatining Xotin-qizlar va gender tenglik masalalari qo‘mitasi raisi Malika Qodirxonova O‘zbekistonga tashrif buyurgan AQSH Davlat departamentining Ayollar ishlari boshqarmasi rejalashtirish bo‘yicha direktori Kristin Borganyen bilan uchrashdi.

Uchrashuvda gender tenglikni ta’minlash bo‘yicha hamkorlik va istiqboldagi vazifalar muhokama qilingan.

Muloqot davomida mehmon mamlakatimizda gender tenglikni, xotin-qizlarning huquq va manfaatlarini ta’minlash, ularni ijtimoiy- iqtisodiy, siyosiy faolligini oshirish borasida amalga oshirilayotgan islohotlar bilan batafsil tanishtirilgan.

Kristin Borganyen O‘zbekistonda gender tenglikni ta’minlash borasida olib borilayotgan ishlarni yuqori baholagan.

Uchrashuvda tomonlar kelgusida xotin-qizlarning ijtimoiy-siyosiy faolligini oshirish hamda ayollarning iqtisodiy huquq va imkoniyatlarini ta’minlashga qaratilgan loyihalarni amalga oshirish bo‘yicha o‘zaro kelishuvga erishgan.

Mavzuga doir: O‘zbekistonda “Gender tenglik faoli” milliy tanlovi e’lon qilindi