O‘zbekistonda asalarichilik mahsulotlarini sertifikatlashtirish laboratoriyasi va o‘quv xonasi tashkil etiladi. Bu haqda Qishloq xo‘jaligi vazirligi xabar bermoqda.
Koreya milliy ilmiy tadqiqotlar fondi (NRF) hamda Koreya ixtirolarni oldinga surish assotsiatsiyasi (KIPA) ushbu loyihani moliyalashtiradi.
Unga ko‘ra, laboratoriya uchun zarur bo‘ladigan asbob-uskuna va jihozlar Koreyadan keltiriladi.
Loyiha 3—5 yilga mo‘ljallangan bo‘lib, 2,5-3 million dollar miqdorida mablag‘ ajratish rejalashtirilgan.
Loyiha doirasida kelgusida asalarichilikda ishlatiladigan asbob-uskunalar, jihozlar va mexanizmlar, sohadan olinadigan mahsulotlar (asalari suti, asalari zaxari, perga, propolis, mum va boshqalar), davolash va profilaktika ishlarini olib borish uchun zarur bo‘ladigan dori vositalari namoyish etadigan ko‘rgazma markazi tashkil etiladi.
Kelajakda O‘zbekiston brendi asosida chiqarilayotgan asal va asalarichilik mahsulotlarini xorijiy davlatlarga sotishda ko‘maklashish ham aynan ushbu loyihaning maqsadlaridan.
Izoh (0)