“Lukoyl” “Spartak” futbol klubini sotib oldi. Leonid Fedun 18 yillik faoliyatidan so‘ng Moskva klubi prezidentligidan ketdi

Moskvaning “Spartak” klubi “Lukoyl” boshqaruviga o‘tdi.

Neft kompaniyasi klubning 100% aksiyasi va “Otkritie Bank Arena” stadionini sotib olganini ma’lum qildi.

Kompaniya 20 yil davomida klubning bosh homiysi bo‘lib kelgandi. Endilikda ham “Lukoyl” klub infrastrukturasini rivojlantirishda davom etadi.

“Spartak” prezidenti Leonid Fedun o‘z lavozimini tark etdi. Bu haqida klub matbuot xizmati ma’lum qildi.

“Kompaniya Leonid Fedunning xizmatlarini qadrlaydi. ‘Lukoyl’ asrlar davomida jamoaning taniqli asoschilari, murabbiylari, sportchilar va millionlab muxlislar armiyasi tomonidan shakllantirilgan an’analarni saqlab, ularni davom ettirishga intiladi”, — deyiladi kompaniya bayonotida.

Xabarga ko‘ra, Fedunning o‘rnini RPL sobiq prezidenti Ashot Xachaturyan egallaydi.

Fedun 2004-yildan buyon klub prezidenti lavozimida faoliyat olib borardi. Uning qo‘l ostida Moskva jamoasi bir marta Rossiya chempionatida g‘alaba qozongan, shuningdek, Rossiya Kubogi va Superkubogiga ega chiqqan.

Eslatib o‘tamiz, Fedun iyun oyida 26 yillik faoliyatdan keyin “Lukoyl” vitse-prezidentligidan ketgandi.