O‘zbekiston Konstitutsiyaga kiritilayotgan o‘zgartirishlar loyihasi ommaviy muhokamaga qo‘yilganidan xabaringiz bor. Bu haqda hatto Prezident Shavkat Mirziyoyev ham bot-bot gapirgan. Aynan “snos” masalasiga to‘xtalgan prezident “Xalqimiz orasida ‘snos’ degan nom bilan mashhur bo‘lgan muammo bor. Bunday holatga butunlay barham berish uchun uy-joy bo‘yicha konstitutsiyaviy kafolatni belgilab qo‘yish lozim. Ya’ni, sudning qarorisiz hech kim uy-joyidan mahrum qilinmasligi kerak. Imorat buzilishga tushadigan bo‘lsa, buning uchun buzishdan oldin uning qiymatiga mos ravishda kompensatsiya to‘lanishi shart. Uy-joyga yoki shaxsning boshqa mol-mulkiga uning ruxsatisiz kirish, ularni ko‘zdan kechirish va tintuv o‘tkazishga faqat qonunda belgilangan holat va tartibda yo‘l qo‘yilishi Konstitutsiyada qat’iy belgilanishi darkor”, degandi.
“Daryo” muxbiri Konstitutsiyaga “snos” masalasida kiritilayotgan o‘zgarish bo‘yicha undan jabr ko‘rgan va o‘sha holat bir umr xotirasida muhrlangan yakkabog‘liklar bilan suhbatlashdi.
“Qani endi shu o‘zgarish 2019-yilning iyul oyidan avval bo‘lgani-da, shaxsan men, otam va onam — oilamiz ‘snos’ degan balodan jabrlanmagan bo‘lardik. O‘sha mudhish voqea — dadamning achchiq ustida hokim o‘rinbosari ustiga benzin sepib, yoqib yuborish voqeasi yuz bermasdi. Bizga o‘xshagan minglab insonlarning uy-joyi, savdo do‘koni buzilmas edi. Millionlar zarar ko‘rmas edi”, — deydi Yakkabog‘ tumani hokimining sobiq o‘rinbosari ustiga benzin sepib yoqib yuborgan tadbirkor Bahriddin Isomovning o‘g‘li Sharofiddin Daminov.
Sharofiddin Daminov 2019-yilning iyul oyidagi “snos” bir umr xotirasida muhrlanganini aytmoqda.
“O‘sha yoz va o‘sha kun bir umr xotiramda muhrlanib qolgan. O‘sha voqea sabab dadam javobgarlikka tortildi. Xonadonimiz, oila a’zolarim jabr ko‘rdi. Xullas, snos degan balo sabab boshimizga ko‘p jabr-u sitamlar yog‘ildi. To‘g‘ri, o‘tib ketdi, ammo bir umr yodimizda qoldi”, — deydi Sharofiddin Daminov.
Suhbatdosh “snos” voqealarini e’tiborga olib, aynan shu masala faqat sud qarori bilan amalga oshirilishi tarafdori bo‘layotgan tashabbuskorlarga rahmat aytmoqda.
“Bu tashabbus aynan xalqning, menga o‘xshagan jabrdiydalarning dardi. Buni inobatga olgan tashabbuskorlar va shuni qo‘llab-quvvatlayotganlarga rahmat. Shu o‘zgarish amaliyotga tatbiq etilib, men va menga o‘xshaganlar snos sabab jabrdiyda bo‘lib qolmaylik”, — deydi Sharofiddin Daminov.
Eslatib o‘tamiz, 2019-yilning 20-iyul kuni Yakkabog‘ tumani hokimi o‘rinbosari Mansur To‘ymayev tadbirkor Bahriddin Isomovga tegishli binoni ekskavator ruliga o‘tirib, o‘zi buzmoqchi bo‘lganida, tadbirkor uning ustiga benzin sepib, yoqib yuborgan edi.
Mavzuga doir:
Izoh (0)