Britaniyalik yozuvchi Salmon Rushdiy nima bilan shug‘ullanayotganini va asarlarining oqibati nimalarga olib kelishini oldindan bilar edi, deydi Davlat dumasi deputati Oleg Morozov. Bu haqda “Gazeta.ru” xabar bermoqda.
Ammo, shu bilan birgalikda, deputatning fikricha, yozuvchiga qilingan hujum qanday maqsadda bo‘lishidan qat’i nazar, jinoyat deb baholanishi kerak.
Rushdiy nima bilan shug‘ullanayotganini yaxshi bilardi. Bu uning tanlovi edi. Va uning kitobiga munosabatni oldindan aytishi mumkin edi, — dedi Morozov.Uning qo‘shimcha qilishicha, diniy ekstremizmni qoralash mumkin, ammo bunday hodisalar kelajakda ham baribir uchrab turaveradi.
Rushdiyning “Shayton oyatlari” (1988) romani islomga zid deb hisoblangani uchun musulmon mamlakatlarida norozilik uyg‘otdi. Eronlik oyatulloh Ruhulloh Humayniy o‘z fatvosida Rushdiyni oshkora la’natlab, o‘limga hukm etgan.
Uzoq vaqt davomida yozuvchi yashirinib yashashga majbur bo‘ldi, uning kitobi ko‘plab mamlakatlarda taqiqlangan. Eronda hatto Humayniy fatvosi ijrosi uchun bir necha million dollar mukofot e’lon qilindi.
Avvalroq Salmon Rushdiy hushiga kelgani va ventilyatordan chiqarilgani xabar qilingandi. Shaxsiy vakil Endryu Uayli yozuvchining ahvoli yaxshilangani haqida xabar berdi. Uning so‘zlariga ko‘ra, Rushdiy shifokorlar bilan gaplashib va hatto hazillasha olyapti.
Mavzuga doir: Suiqasd oqibatida yaralangan yozuvchi Salmon Rushdiy sun’iy nafas oldirish apparatiga ulandi. U bir ko‘zidan ayrilishi mumkin
Izoh (0)