Farg‘ona viloyatining Toshloq tumanida Janubiy Koreyaga ishga jo‘natishini aytib fuqaroning pullarini firibgarlik yo‘li bilan qo‘lga kiritgan shaxsga jinoyat ishi qo‘zg‘atildi. Bu haqda Bosh prokuratura huzuridagi departament xabar berdi.
Departamentning Toshloq tumani bo‘limi tomonidan o‘tkazilgan tergovga qadar tekshiruvda fuqaro M. fuqaro R.ni tanishlari yordamida Janubiy Koreyaga ishga jo‘natish evaziga olgan 5 400 dollardan 1 000 dollarni qaytargan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Shu kabi holat Farg‘ona shahrida iyul oyida ham yuz bergandi. S.D. ismli shaxs fuqaro Y.B.ning ishonchiga kirib, tanishlari orqali Janubiy Koreyaga ishga jo‘natishini aytib, 10 ming dollarni firibgarlik yo‘li bilan qo‘lga kiritgan, ammo pullarni o‘z ehtiyojiga sarflab yuborgandi.
Izoh (0)