O‘zbek do‘ppisini kiygan o‘g‘lon, miltiq o‘qlayotgan polvon: Dehqonobodda bo‘lib o‘tgan ko‘pkurash harbiy-vatanparvarlik musobaqasi — suratlarda

Qashqadaryo viloyatining Dehqonobod tumanida ko‘pkurash harbiy-vatanparvarlik musobaqasining final bosqichi bo‘lib o‘tdi. Bu haqda “Daryo” muxbiri xabar berdi.

Ma’lum bo‘lishicha, musobaqaning final bosqichida tumanning “Chuchuquduq”, “Aerodrom” va “Dehqonobod” mahallasi jamoalari ishtirok etgan.

Ushbu yakuniy bosqichda “Chuchuquduq” mahallasining “Shovvozlar” jamoasi 1-o‘rinni, “Aerodrom” mahallasining “Burgutlar” jamoasi 2-o‘rinni, “Dehqonobod” mahallasining “Alpinistlar” jamoasi 3-o‘rinni qo‘lga kiritdi. Barcha o‘rin sohiblari munosib taqdirlandi. “Chuchuquduq” mahallasining “Shovvozlar” jamoasi esa viloyat bosqichiga yo‘llanmani qo‘lga kiritdi, — deydi Dehqonobod tumani hokimligi axborot xizmati xodimi Murodjon Amirov.

Ta’kidlanishicha, DXX viloyat boshqarmasi va tuman hokimligi hamkorligida o‘tkazilgan tadbirda DXXning viloyat boshqarmasi boshlig‘i, Dehqonobod tumani hokimi va sektor rahbarlari ishtirok etgan.

Musobaqa so‘ngida katta konsert dasturi namoyish etilgan.