Farg‘ona viloyati Uchko‘prik tumanida xonadonida marixuana yetishtirib, nasha saqlagan fuqaro ushlandi. Bu haqda viloyat ichki ishlar boshqarmasi axborot xizmati xabar berdi.
Qayd etilishicha, 6-avgust kuni Farg‘ona viloyati IIB xodimlari tomonidan o‘tkazilgan tezkor tadbir jarayonida Uchko‘prik tumani Mazzangli ko‘chasida yashovchi M.I.ning yashash manzili ko‘zdan kechirilgan. Unda fuqaro M.I. xonadonidagi yer maydonida 17 tup marixuana giyohvandlik o‘simligini yetishtirayotgani aniqlangan.
Bundan tashqari, og‘ilxonasining turli joylaridan qog‘oz va sellofan paketlariga solingan va oshxonasidagi javon ichidan qog‘oz qutilarga solingan jami 5 kilogramm 227 gramm nasha giyohvandlik moddalari topilgan.
Shuningdek, M.I.ning mehmonxonasida 1 dona polimer qopda ko‘knori giyohvandlik o‘simligi poyalari va 1 dona polimer sumkada ko‘knori boshoqlari — jami 7 kilogramm 729 gramm ko‘knori giyohvandlik vositalari topilib, xolislar ishtirokida daliliy ashyo tariqasida olingan.
Mazkur holat yuzasidan Farg‘ona viloyati IIB TXTB tergov bo‘limi tomonidan Jinoyat kodeksining 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qism “a” bandi bilan jinoyat ishi qo‘zg‘atilib, protsessual tartibda ushlangan.
Ma’lumot uchun, Jinoyat kodeksining 276-moddasi 2-qismida ko‘rsatilgan jinoyatni sodir etgan shaxs 5 yilgacha ozodlikdan mahrum qilish bilan jazolanishi mumkin.
Izoh (0)