Pelosi Yaponiya bosh vaziri Kisida bilan Tayvan atrofidagi vaziyatni muhokama qildi

AQSH Vakillar palatasi spikeri Nensi Pelosi va Yaponiya bosh vaziri Fumio Kisida Tayvan bo‘g‘ozida tinchlik va barqarorlik hukm surishi tarafdori ekanini ma’lum qildi. Ularning bayonoti Pelosining Tayvanga tashrifidan so‘ng kuchaygan keskinlik fonida yangradi, deb xabar bermoqda Kyodo.

Kisida Pelosiga Xitoy harbiy mashg‘ulot chog‘ida ballistik raketalar uchirgani, uning harakatlari “mintaqa va undan tashqarida tinchlik va barqarorlikka katta ta’sir ko‘rsatayotganini” aytdi.

Xitoy 4-avgust kuni beshta ballistik raketani uchirgan, ular Yaponiyaning eksklyuziv iqtisodiy zonasiga kelib tushgan. Bundan tashqari Yaponiya va Xitoy tashqi ishlar vazirlarining Kambodjadagi uchrashuvi bekor qilingan. Yaponiya tashqi ishlar vaziri Yosimasa Xayasi Xitoyning manyovrlarini mamlakat xavfsizligi uchun “jiddiy muammo” deb atagan va Pekindan mashg‘ulotlarni zudlik bilan to‘xtatishni talab qilgan.

Pelosining orolga tashrifiga javoban Xitoy Tayvan yaqinida harbiy mashg‘ulotlarni boshlagan edi. Xitoy Pelosining orolga tashrifini mamlakat suverenitetini buzish sifatida baholadi: rasmiylar Tayvanni o‘zlarining provinsiyasi deb biladi. Spiker u yerga safarini rasman e’lon qilmagan va XXRning ogohlantirishlariga e’tibor bermagan edi.

AQSH Pelosining tashrifi Vashingtonning Tayvanga nisbatan siyosatiga mos kelishini va “mojaro uchun hech qanday sabab” ko‘rmaganini ta’kidladi.