Samarqandda mahalla raisi fuqaroga kuch ishlatgani aytilmoqda

Ijtimoiy tarmoqlarda “Mahalla raisi fuqaroga kuch ishlatgani aytilmoqda” sarlavhasi ostida video tarqalgan. Holat yuzasidan Samarqand viloyati IIB ma’lumot berdi.

2022-yilning 30-iyul kuni Paxtachi tumani “Quvondiq” mahallasida yashovchi fuqaro 102 raqamiga qo‘ng‘iroq qilib, turmush o‘rtog‘i R.U. mast holatda janjal qilayotgani bo‘yicha murojaat qilgan.

Murojaat yuzasidan hudud profilaktika inspektori A.Egamberdiyev va shu mahalla raisi fuqaro R.U.ning uyiga borishganida, haqiqatan ham fuqaro R.U. mast holatda turmush o‘rtog‘i bilan janjal qilayotgani aniqlangan.

Shundan so‘ng profilaktika inspektori hamda mahalla raisi fuqaroni mastlik holati tarqagunga qadar tuman IIB binosida saqlash maqsadida olib ketishmoqchi bo‘lganda, u profilaktika inspektorining qonuniy talabini bajarmagan.

Mahalla raisi R.U. ni tinchlanishi va hushyor tortishi uchun yelkasiga ikki marotaba qo‘lining kaft qismi bilan tegingan.

R.U. tuman IIB binosiga olib kelinib, tegishli tartibda rasmiylashtirilib, mastlik holati tarqagandan so‘ng, uyiga ruxsat berilgan.