2022-yilning birinchi yarmida O‘zbekiston iqtisodiyoti asosiy savdo sheriklari bo‘lgan mamlakatlardagi beqarorlik, jahon tovar bozoridagi o‘zgaruvchanlikning oshishi bilan bog‘liq tashqi risklar ta’siri ostida qoldi, deb yozmoqda Review.
Shunga qaramay, O‘zbekiston iqtisodiyoti birinchi yarim yillikda ijobiy o‘sish dinamikasini ko‘rsatdi.
Davlat statistika qo‘mitasi ma’lumotlariga ko‘ra, O‘zbekiston yalpi ichki mahsuloti (YIM) 2022-yilning yanvar—iyun oylarida o‘tgan yilning mos davriga nisbatan 5,4 foizga o‘sdi.
Inflyatsiya
Birinchi yarim yillikda tashqi shoklar fonida yillik inflyatsiya biroz tezlashdi va 6,5 foizni tashkil etdi.
Narxlar o‘sishining tezlashishi oziq-ovqat mahsulotlarida — 8,9 foiz, shuningdek, nooziq-ovqat mahsulotlarida — 5,8 foizni qayd etdi. Xizmatlar narxi 3,3 foizga ko‘tarildi.
Investitsiyalar
2022-yil yanvar—iyun oyi natijalariga ko‘ra, asosiy kapitalga yo‘naltirilgan investitsiyalar 121,8 trln so‘mni tashkil etdi va o‘tgan yilning mos davriga nisbatan 9,4 foizga o‘sdi.
Markazlashtirilmagan investitsiyalar bo‘yicha o‘sish dinamikasi 17,6 foizga oshdi. Jalb etilayogan to‘g‘ridan to‘g‘ri xorijiy investitsiyalar va xorijiy kreditlar hisobidan investitsiyalar hajmi 5,2 foizdan ziyodga ortdi.
Shuningdek, korxonalar mablag‘lari hisobidan investitsiyalar bo‘yicha ikki baravar o‘sish 35 foizni tashkil etdi.
Markazlashtirilgan investitsiyalar 27,5 foizga qisqardi. Xususan, davlat tomonidan kafolatlangan xorijiy kreditlar hisobiga investitsiyalar 54,3 foizga kamaydi. Shu bilan birga, budjet investitsiyalari 30,4 foizga o‘sdi.
2022-yilning birinchi yarmida investitsiyalarning umumiy hajmida markazlashtirilgan investitsiyalarning ulushi 18,1 foizdan 12 foizga kamaydi va markazlashtirilmagan investitsiyalarning ulushi mos ravishda 81,9 foizdan 88 foizga o‘sdi.
Sanoat mahsulotlarini ishlab chiqarish
2022-yil yanvar—iyun oylarida korxonalar tomonidan 251,4 trln so‘mlik sanoat mahsulotlari ishlab chiqarildi, o‘sish o‘tgan yilning shu davriga nisbatan 5,1 foizni tashkil etdi.
Xizmatlar sektori
Xizmat ko‘rsatish sohasi birinchi yarim yillikda ikki xonali o‘sish sur’atlarini ko‘rsatdi. Bozor xizmatlari ishlab chiqarish hajmi 14,5 foizga oshdi.
Moliyaviy sektorda — 28,8 foiz, AKT sohasida — 21,3 foiz boshqa xizmatlarda — 15,2 foizga o‘sdi.
Turar joy va umumiy ovqatlanish sohasida xizmatlar hajmi 13,9 foiz, transport sektorida 11,2 foiz, ko‘chmas mulk bilan bog‘liq xizmatlar sohasida esa 10,3 foizga o‘sdi.
Qurilish sektori
2022-yil yanvar—iyun oylarida qurilish ishlari hajmi 60,3 trln so‘mni, o‘sish sur’ati 6,2 foizni tashkil etdi. Taqqoslash uchun, o‘tgan yilning birinchi yarmida bu ko‘rsatkich 0,1 foizni tashkil etgan.
Qishloq xo‘jaligi
2022-yil yanvar—iyun oylarida qishloq, o‘rmon va baliq xo‘jaligi mahsulotlari hajmi 131,7 trln so‘mni tashkil etdi va 2021-yilning mos davriga nisbatan 2,7 foizga o‘sdi.
Shu bilan birga, o‘simlikshunoslik va chorvachilikda o‘sish sur’atlari 2,7 foiz, o‘rmon xo‘jaligida 2,0 foiz, baliqchilikda 11,5 foizni tashkil etdi.
Avvalroq O‘zbekisonning 2022-yil yanvar—iyun oylaridagi tashqi savdo aylanmasi ma’lum bo‘lgan.
Izoh (0)