Italiya poytaxti Rim shahrida Buxoro amirining oltin kolleksiyasi borligi aniqlandi. Bu haqda Samarqandda bo‘lib o‘tayotgan VI Xalqaro kongressda mashhur Sharq xalqlari san’ati milliy muzeyi vakili Paola Damore ma’lum qildi, deb yozadi bloger Shahnoza Soatova.
Qayd etilishicha, Paola Damore o‘z nutqida Rimning “Juzeppe Tuchchi” muzeyidan Buxoro amirining oltin kolleksiyasi saqlanayotganini aytgan.
“Bu shaxsan men uchun kongressdan olgan eng katta yangiliklardan biri bo‘ldi. Shuningdek, mehmon muzeyda Kushonlar davriga oid osori-atiqalar – marjonlar, uzuklar, bilaguzuklar, sirg‘alar va tilla quymalari, O‘zbekiston tarixiga oid turli bezakli taqinchoqlar o‘rin olganini ham aytib o‘tdi”, — deydi Shahnoza Soatova.
Paola Damore 60 jildlik “O‘zbekiston madaniy merosi jahon to‘plamlarida” kitob-albomiga alohida qiziqish bildirib, Butunjahon jamiyati tomonidan amalga oshirilayotgan ishlarni qo‘llab-quvvatlashini bildirgan. O‘zbekiston madaniy merosini asrash, o‘rganish va ommalashtirish bo‘yicha Butunjahon jamiyatining VI Xalqaro Kongressi Eriell Group kompaniyasi homiyligida tashkil etilgan.