Oziq-ovqat inqirozini hal qilish uchun hech qanday chora ko‘rilmasa, insoniyat ommaviy ocharchilik, siyosiy beqarorlik va nazoratsiz migratsiyaga duch keladi. Bu haqda BMTning Jahon oziq-ovqat dasturi bayonotida aytiladi.
BMT dasturi 2022-yilni “misli ko‘rilmagan ochlik yili” deb nomladi. BMT ma’lumotlariga ko‘ra, har kuni 828 million odam to‘yib ovqatlanmaydi.
Oziq-ovqat bilan ta’minlanmaganlar soni 2019-yildagi 135 milliondan 345 millionga ko‘payadi.
45 mamlakatda 50 million odam ochlik yoqasida yashaydi. BMT 152 million odamni boqish uchun 22,2 mlrd dollar kerak bo‘lishini aytmoqda.
BMT ommaviy ochlikning to‘rtta sababini keltridi:
- qurolli mojarolar;
- iqlim ofatlari;
- COVID-19 pandemiyasining oqibatlari;
- narxlarning oshishi.
Tashkilot ma’lumotlariga ko‘ra, ochlikni boshdan kechirayotganlarning 60 foizi qurolli to‘qnashuvlar sodir bo‘ladigan hududlarda yoki atrofida yashaydi.
Biz hozir misli ko‘rilmagan inqirozga duch kelyapmiz va agar uni strategik hamda samarali hal qilmasak, biz katta ocharchilik, o‘nlab mamlakatlarning beqarorlashishi va ommaviy migratsiyaga duch kelamiz, — dedi oziq-ovqat dasturi direktori Devid Bizli.
Bizli 2023-yil bu yilgidan yomonroq bo‘lishi mumkinligi haqida ogohlantirdi. Shuningdek, u jahon hamjamiyati yaqin 6-12 oy ichida oziq-ovqat narxi oshishi sababli qiyinchiliklarga duch kelishini tan oldi. Muammo hal etilmasa, dunyo oziq-ovqat taqchilligi ostida qoladi.
Iyul oyi boshida BMT Ukrainadagi jangovar harakatlar tufayli bu yil dunyoda 13 millionga yaqin odam qo‘shimcha ravishda to‘yib ovqatlanmaslik muammosiga duch kelishini bashorat qilgan edi.
Yangilangan prognozlarga ko‘ra, 2030-yilda ham 670 milliondan ortiq odam ochlikni boshdan kechirishi mumkin.
Izoh (0)