O‘zbekiston o‘z mahsulotlarini Gruziya portlari orqali Yevropaga eksport qilish imkoniyatlarini muhokama qilmoqda, deb xabar berdi 19-iyul kuni Gruziya Vazirlar Mahkamasi matbuot xizmati.
Gruziya bosh vaziri Irakliy Garibashvili boshchiligidagi hukumat delegatsiyasi 18-iyul kuni Toshkentga keldi.
19-iyul kuni ertalab Irakliy Garibashvili va O‘zbekiston bosh vaziri Abdulla Aripov o‘zaro Vazirlar Mahkamasi a’zolari ishtirokida ham yakkama-yakka va kengaytirilgan tarkibda muzokaralar o‘tkazdi. Asosiy e’tibor ikki davlat o‘rtasidagi iqtisodiy sohadagi munosabatlarga qaratildi.
O‘zbekiston mahsulotlarini Yevropa bozoriga eksport qilish uchun Gruziya transport infratuzilmasi va portlaridan foydalanish imkoniyatlari muhokama qilindi, — deb xabar qildi Gruziya hukumati matbuot xizmati.
Uchrashuvda Gruziya O‘zbekiston uchun “eng muhim transport yo‘laklaridan biri” ekanligi alohida ta’kidlandi.
Garibashvili Gruziyaning Boku—Tbilisi—Kars temiryo‘li, Qora dengiz—Kaspiy dengizi yo‘li, Sharq-G‘arbiy avtomobil yo‘lini qurish va rekonstruksiya qilish kabi muhim loyihalarda ishtirok etayotganiga e’tibor qaratdi.
Tomonlar qo‘shma korxonalar tashkil etish masalasini muhokama qildi.
Gruziya va O‘zbekiston o‘rtasida erkin savdo rejimi mavjud. 2021-yilda mamlakatlar o‘rtasidagi tovar ayirboshlash hajmi 18,5 foizga o‘sib, 115 mln dollarni tashkil etdi.
O‘zbekiston Gruziyaga asosan sanoat tovarlari, kimyo mahsulotlari, ichimliklar, avtomobillar va transport uskunalarini yetkazib beradi.
Gruziya, o‘z navbatida, farmatsevtika mahsulotlari, transport uskunalari, oziq-ovqat mahsulotlarini eksport qiladi.
Transkaspiy xalqaro transport yo‘nalishi (TITR) orqali tashiladigan yuk Boku va Gruziya orqali Turkiyaning Ambarli portiga va undan keyin Yevropa dengiz bandargohlariga yetkazilishi rejalashtirilgan.
Izoh (0)