Bolalar futbolida to‘pga bosh bilan zarba berish taqiqlanishi mumkin. Amaliyot Angliyada sinovdan o‘tkaziladi

Angliyada bosh bilan o‘ynashga qo‘yiladigan taqiq yosh futbolchilarda sinab ko‘riladi.

Angliya futbol assotsiatsiyasi (FA) Xalqaro futbol assotsiatsiyasi kengashidan (IFAB) 12 yoshgacha bo‘lgan bolalar futbolida bosh bilan zarba berishni taqiqlashni sinovdan o‘tkazish uchun ruxsat olganini e’lon qildi.

Bu amaliyot yangi mavsumdan qo‘llaniladi. Agar sinov muvaffaqiyatli o‘tsa, 2023/24-yilgi mavsumdan boshlab ushbu yosh toifasidagi barcha futbol o‘yinlarida bosh bilan zarba berishga taqiq qo‘yiladi.

Ushbu harakatlar sobiq futbolchilarning miya bilan bog‘liq muammolar tufayli o‘limi oddiy odamlarnikidan ko‘proq ekanligini ko‘rsatuvchi tadqiqotlar fonida amalga oshirildi. Masalan, professional futbolchilar demensiyadan o‘rtacha hisobda o‘sha yoshdagi odamlarga qaraganda uch yarim baravar ko‘proq vafot etmoqda, deb yozadi BBC.