O‘zbekistonda kadastr hujjatlari bo‘lmagan xonadonlarga yer solig‘ini uch karra oshirib hisoblash amaliyoti vaqtincha to‘xtatib turiladi

Shavkat Mirziyiyev 18-iyul kuni o‘tkazilgan yig‘ilishda kadastr hujjatlari bilan bog‘liq muammoga to‘xtalib o‘tdi. Bu haqda prezident matbuot kotibi xabar qildi.

Qayd etilishicha, 2 million 600 mingta aholi xonadonlarining kadastr hujjatlari yo‘q. Ushbu aholi tomorqa uchun kredit, subsidiya hamda uy-joyini kengaytirishga ipotekadan foydalana olmayotgani haqida Xalq qabulxonalariga murojaatlar tushmoqda. Shuningdek, kadastri bo‘lmagani uchun yer solig‘i 3 karra miqdorda hisoblanmoqda.

Shu bois Adliya vazirligi, Soliq qo‘mitasi, Kadastr agentligiga bir hafta muddatda ishchi guruhlarini shakllantirib, ishlarni boshlash topshirilgan. Ishchi guruhlari:

• 1-oktabrga qadar mahallabay kadastr hujjati bo‘lmagan xonadonlarning elektron ro‘yxatini shakllantiradi;
• uy-joyga bo‘lgan huquqlarni e’tirof etishga asos bo‘luvchi hujjatlarni to‘playdi va elektron bazaga kiritadi.

Mutasaddilarga respublikaning barcha hududlarida kadastri yo‘q xonadonlar masalasini uzil-kesil hal qilish uchun alohida qonun loyihasini ishlab chiqib, muhokamaga kiritish vazifasi qo‘yilgan.

Yangi qonun qabul qilinguniga qadar bu uy-joy egalariga uch karra oshirilgan soliq qo‘llash to‘xtatib turishga qaror qilingan.