Oliy Majlisi Senati raisi Tanzila Norboyeva 15-iyul kuni davlat tashrifi bilan O‘zbekistonda bo‘lib turgan Turkmaniston prezidenti Serdar Berdimuhamedov bilan uchrashdi. Bu haqda Senat axborot xizmati xabar qildi.
Qayd etilishicha, suhbat chog‘ida parlamentlararo muloqot mamlakatlar o‘rtasidagi har tomonlama hamkorlik va strategik sheriklikni mustahkamlashning muhim qismiga aylangani ta’kidlangan. O‘zbekiston Oliy Majlisi va Turkmaniston Milliy Kengashi huzurida tashkil etilgan parlamentlararo do‘stlik guruhlarining faoliyati alohida qayd etilgan.
Joriy yil may oyida Ashxobod shahrida o‘tkazilgan Markaziy Osiyo mamlakatlari va Rossiyaning birinchi parlamentlararo forumi va Ayollar muloqoti doirasidagi birinchi yig‘ilish yakunlari yuqori baholangan. Barqaror rivojlanish sohasidagi milliy maqsad va vazifalarni implementatsiya qilish borasida tajriba almashish, madaniy-gumanitar aloqalarni kengaytirish, tomonlarni qiziqtirgan barcha yo‘nalishlar bo‘yicha qo‘shma tadbirlar tashkil etishga kelishib olingan.
Uchrashuv yakunida tomonlar ikki davlat manfaatlari yo‘lida parlamentlararo aloqalarni mustahkamlashga tayyor ekanini ta’kidlagan.
Izoh (0)