Xonanda, kompozitor Baxtiyor Rahmonov “Shok.uz” YouTube-kanaliga bergan intervyusida Manzura bilan munosabati, Gulnora Karimova va u haqidagi mish-mishlar haqida, O‘zbekistonning birinchi prezidenti Islom Karimovning vafotiga bag‘ishlangan qo‘shiqni qanday qilib bir kunda tayyorlagani, Asal Shodiyeva uning klipiga bepul tushishini aytgani, kasal bo‘lib ko‘chaga chiqolmagani, bitta musiqani qanchaga yozib berishini aytdi.
Baxtiyor Rahmonov Manzura bilan munosabatlari haqida
“Manzurani opamdek ko‘raman. Ular bilan 6-7 yil, umuman olganda, 10 yildan beri tanishmiz. Bir-birimiznikiga mehmonga borib turamiz. Ularning klipida mening farzandim rol o‘ynadi”, — deydi xonanda.
Gulnora Karimova xonandaga homiylik qilganmi?
“Gulnora Karimova menga homiylik qilmagan, bir tiyin ham bermagan. Tadbirlarga keladigan bo‘lsak, taklif qilishgan, borganman. Hech qanday gonorar ham olmaganman. Qo‘shiqlarimni o‘zim bastalab kuylaganman. Ijodimning boshida Shekspirning she’rlariga, Navoiy g‘azallariga musiqa bastalaganman. Gulnora Karimova “Quyosh porlamoq uchun” nomli taronani ham sovg‘a qilmagan. Ushbu qo‘shiqning she’rini menga berishgan, boshida ikki-uch qatorlardan tashkil topgan edi. Bu qo‘shiqni boshida Shekspirning bir sonetiga atab yozganman. Inglizchasiga, ruschasiga aytib ko‘rganman. Keyin esa “Quyosh porlamoq uchun” taronasi ikki-uchta she’rning birlashgan variantidan yaraldi”, — deydi Baxtiyor Rahmonov.
Islom Karimovga atalgan qo‘shiq
“Bu bir kunda tayyorlangan qo‘shiq emas. Ushbu she’rga 2013—2014-yillarda qo‘shiq yozilgan edi. She’r “Uzoqroq yashang” deb nomlanagan edi va shoir Eshqobil Shukur qalamiga mansub bo‘lgan. Aslida u 90-yillarda ustidan benzin quyib yoqqan ayollarga bag‘ishlangan she’r edi. Men 2014-yilda musiqa bastalaganman. Shunda asli surxondaryolik bo‘lgan shoir Eshqobil Shukur menga 90-yillarda ustidan benzin quyib yoqqan ayollar haqida gapirib bergan. O‘zim ham shunday holatlarning guvohi bo‘lganman. Birorta qarindoshim yoki yaqinim bilan bunaqa voqea kuzatilmagan, lekin shunday holatlar bo‘lgan. Islom Karimovning vafotidan bir ikki kun oldin menga shu she’rga 1-2 kunda qo‘shiq tayyorlashimni aytishgan. Keyin she’rni qayta to‘g‘irlab berishgandan keyin menga yoqdi va qo‘shiq kuyladim”, — deydi u mish-mishlarga javoban.
Asal Shodiyeva “Eshikka suyanib jilmaygan ayol” klipidagi ishtiroki uchun pul olmagan
“Asal bu klipda o‘zim rol o‘ynayman degan. U turmush qurgandan keyin uncha gaplashganim yo‘q. ‘Eshikka suyanib jilmaygan ayol’ qo‘shig‘i hali tayyor bo‘lmasidan, studiyada yozilmasidan oldin gitara bilan ijro qilgan vaqtimda Asalga yoqqan. Agar shu musiqaga klip oladigan bo‘lsang o‘zim rol o‘ynayman degan taklifni bildirgan. Biz yaqin do‘st edik. Klip yaratilishi haqidagi xabarni eshitgan va o‘zi rol ijro etishini bildirgan. Klipning sujeti ham Asalga moslab olingan”, — deya ma’lum qildi xonanda.
5-6 yil to‘shakka mixlagan kasallik
“Haqiqatan ham shunaqa kasal bo‘lganman, endi tirik jonning isitmasi bo‘ladi. Nevrologiya bilan bog‘liq kasallik edi. Hozir ahvolim yaxshi. Bu kasallikka chalinganimdan keyin 5-6 yil davomida uyda ham, klinikada ham davolandim. Musiqadan chetlashishimga ham shu kasallik sababchi bo‘ldi. Sababsiz shunaqa kasalikka chalindim. Hozirgacha nimaga bunaqa bo‘lganini bilmayman. O‘tgan yili konsert berganimda viloyatlardan menga qo‘ng‘iroq qilishdi. Sizning shunaqa kasallikka chalinganingizni eshitdik, yaxshi bo‘lib ketdingizmi, konsert qo‘yayotgan ekansiz deyishdi. Keyin bitta ayol menga mening qizim devorni ushlab yuribdi, farzandi bor dedi. Keyin men undan qizining oshqozoni og‘rishi yoki og‘rimasligi haqida so‘radim. U ha, og‘riydi deb aytdi. Men esa vrach yozib bergan dorilarni ichganidan keyin shunaqa bo‘ldimi, deb so‘radim va ayol bunga ham ha deb javob berdi. Dorilarni qaysi shifokor yozib berganini so‘radim, u esa qaysidir mashhur shifokorning ismini aytdi. O‘sha vrachga mening nomimdan salom ayting, u katta xato qilibdi, hech qachon mana shu dorini suv bilan ichish kerak emas, oshqozonni ham o‘ylash kerakligini va dorini sut yoki kisel bilan ichish kerakligi haqida gapirdim. Ayniqsa gormonlarni suv bilan ichish mumkin emas. Balki bu kasallik O‘rta Osiyo issiq iqlimli bo‘lgani uchun bizdan yiroq kasallik bo‘lgandir, hozir ham ko‘p uchramaydi”, — deydi u.
Shuningdek, xonanda bitta qo‘shiqni 2000-3000 dollarga yozib berishini ham aytib o‘tgan.
Mavzuga doir: