“Tabiatni asrab-avaylash har bir insonning o‘z qo‘lida!” — Yangihayot tumanida atrof-muhitni muhofaza qilishga chaqiruvchi installyatsiya bunyod etildi (video)

Toshkent shahridagi Yangihayot tumanida qo‘l ichida daraxt o‘sayotgan installyatsiya yaratildi. “Daryo” muxbiri tabiatni asrash g‘oyasini o‘zida mujassamlashtirgan installyatsiyaning yaratilishi haqida reportaj tayyorladi.

Yangihayot tumani hokimligi mas’ul xodimi Jahongir Mardonovning aytishicha, installyatsiyani qurib bitkazish uchun 20 kun vaqt ketgan.

“Avval bu chorraha tashlandiq bo‘lib yotgan joy edi. Dam olish maskanlari, jumladan, yashil maydonlar sonini ko‘paytirish maqsadida ushbu joy obod qilindi. Buning uchun hokimlik tomonidan 250 million so‘m sarflandi. Ramziy qo‘l ichiga judayam chiroyli gullaydigan yapon saforasi ekilgan”, — dedi Jahongir Mardonov.

Uning ta’kidlashicha, installyatsiyaning ma’nosi — “Tabiatni asrab-avaylash har bir insonning o‘z qo‘lida!”

Tuman hokimi Hayot Inog‘omovning qo‘shimcha qilishicha, bu kabi installyatsiya tumanning boshqa hududlarida ham o‘rnatish rejalashtirilgan.