Shavkat Mirziyoyev 6-iyul kuni 1-sentarbrga qadar tuman va shaharlarda ipoteka markazlarini tashkil etish to‘g‘risida ko‘rsatma berdi. Bu haqda prezident matbuot kotibi xabar bermoqda.
Shuningdek, yaratilgan imkoniyat va shart-sharoitlarga qaramasdan, ipoteka krediti orqali aholini uy-joylar bilan ta’minlash ishlari talab darajasida emasligi ko‘rsatib o‘tildi.
Ma’lum bo‘lishicha, joriy yilda 43 mingta uy-joy uchun budjetda banklarga 13 trln so‘m resurs ko‘zda tutilgan bo‘lib, o‘tgan olti oyda 3,6 trln so‘m yoki ularning 28 foizi o‘zlashtirilgan.
29 ming nafar aholiga subsidiya uchun 1,2 trln so‘m ajratilgan bo‘lsada, 8,5 ming nafariga 365 mlrd so‘m yoki mablag‘ning 30 foizi to‘lab berilgan.
Ajratilgan resurs va subsidiyani o‘zlashtirish darajasi Sirdaryo, Jizzax, Qashqadaryo va Toshkent viloyatlarida 25 foizdan past.
Ipoteka markazlari aholiga yangi uy-joylar loyihasi, narxi, kredit va subsidiya shartlari bo‘yicha batafsil ma’lumot beradi.
Avvalroq O‘zbekistonda eng foydali ipoteka kreditlari haqida ma’lumot berilgan edi.