Buxoro aeroportida 27 ming dollar pulni noqonuniy ravishda xorijga olib chiqib ketayotganlar ushlandi. Bu haqda “Daryo”ga viloyat Bojxona boshqarmasi axborot xizmati rahbari Javohir Ismoilov xabar berdi.
Ta’kidlanishicha, Buxoro aeroporti chegara bojxona posti xodimlari qonunda belgilangan tartibda xorijga jo‘nab ketayotgan yo‘lovchilarni nazoratdan o‘tkazgan. Buxorolik T.Q., S.F. va S.A. ismli fuqarolarning yashil yo‘lakdagi xatti-harakatlari bojxonachilar e’tiborini tortgach, ushbu shaxslar alohida tartibda bojxona nazoratidan o‘tkazilgan.
Natijada ushbu fuqarolar egnidagi kostyum-shimlarning ichki cho‘ntaklaridan yo‘lovchi bojxona deklaratsiyasida ko‘rsatilmagan va bojxonachilarning og‘zaki so‘rovida ma’lum qilinmagan 9 ming dollardan jami 27 ming dollar naqd xorijiy valyuta topilgan. Ular ushbu pullarni O‘zbekistondan noqonuniy ravishda olib chiqib ketish rejasini tuzgan bo‘lgan.
“O‘zbekistondan xorijga chiqib ketayotgan uch fuqaroning rejasi amalga oshmay qoldi. Ular noqonuniy xatti-harakatlari uchun qonun oldida javob beradigan bo‘lishdi”, — dedi Javohir Ismoilov.
Izoh (0)