Qozog‘iston Respublikasi Tashqi ishlar vazirligi Qoraqalpog‘istonda sodir bo‘layotgan so‘nggi voqealar bo‘yicha bayonot bilan chiqdi.
Qayd etilishicha, O‘zbekiston Qozog‘istonning qardosh davlati, ishonchli ittifoqchisi va strategik hamkori hisoblanadi. Shu bois Qozog‘istonda O‘zbekistondagi voqealar xavotir bilan qabul qilingan.
“Biz O‘zbekiston oliy rahbariyatining Qoraqalpog‘iston Respublikasidagi vaziyatni barqarorlashtirishga qaratilgan qarorlarini olqishlaymiz va qo‘llab-quvvatlaymiz.
Eng muhim siyosiy voqea — Konstitutsiyaga o‘zgartirishlar kiritish bo‘yicha referendum arafasida qardosh O‘zbekistonda tinchlik va osoyishtalik hukm surishiga ishonchimiz komil.
Qozog‘iston 1998-yil 31-oktabrdagi Abadiy do‘stlik va 2013-yil 14-iyundagi Strategik sheriklik to‘g‘risidagi shartnomalar, shuningdek, 2021-yil 6-dekabrdagi Ittifoqchilik munosabatlari to‘g‘risidagi deklaratsiya ruhida O‘zbekiston bilan har tomonlama hamkorlikni rivojlantirish va mustahkamlash yo‘nalishiga qat’iy amal qiladi”, — deyiladi xabarda.
Izoh (0)