Qashqadaryo viloyati Nishon tumani va Samarqand shahrida noqonuniy valyuta ayirboshlash holatlarining oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Nishon tuman bo‘limi va viloyat IIB tomonidan tezkor tadbir o‘tkazilgan. Unda valyuta qimmatliklarini muomalaga kiritish faoliyati shug‘ullanib kelayotgan B.N. boshqa bir fuqaro B.ga jami 10 ming dollarni 109,5 million so‘mga sotgan vaqtida ashyoviy dalillar bilan qo‘lga olingan.
Bundan tashqari, Samarqand shahrida o‘tkazilgan tezkor tadbirda fuqaro A.V. valyuta qimmatliklarini muomalaga kiritish faoliyati shug‘ullanib kelayotgani aniqlangan. U jami 3 ming dollarni fuqaro A.ga 32,7 million so‘mga sotgan vaqtida ashyoviy dalillar bilan ushlangan.
Holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Mavzuga doir:
Izoh (0)