Rossiyaning Rostov viloyatidagi Novoshaxtinsk neftni qayta ishlash zavodi 22-iyun kuni ertalab uchuvchisiz uchar qurilma hujumiga uchradi, shundan keyin u yerda yong‘in boshlandi, deb xabar beradi Meduza. Jabrlanganlar haqida ma’lumot yo‘q.
Ijtimoiy tarmoqlarda dronga o‘xshagan uchar qurilma zavodga qarab uchib kelayotganini ko‘rish mumkin. Shu payt zavodda portlash sodir bo‘ladi. Shot Telegram-kanali e’lon qilgan tasvirlarda, da’vo qilinishicha, dron bo‘laklarini ko‘rish mumkin — korxona yaqinida ikkita qurilma bo‘laklari topilgani aytilmoqda.
“TASS”ning mahalliy organlardagi manbasi dron haqidagi axborotni tasdiqladi. “Yong‘in oldidan zavod xodimlari Ukraina dronini payqab qolgan. U zavod konstruksiyasiga kelib urilgan, shundan so‘ng portlash va yong‘in yuz bergan”, — dedi u.
Ukraina hukumati Rossiya neftni qayta ishlash zavodiga zarba berilganini rasman tasdiqlagani yo‘q.
Novoshaxtinsk zavodi vakili korxonadagi yong‘inga “Rostov viloyatining g‘arbiy chegarasi tomondan amalga oshirilgan terrorchilik harakatlari natijasida” ikkita uchuvchisiz uchar qurilma bergan zarba sabab bo‘lganini ma’lum qildi. O‘z navbatida, mintaqa gubernatori Vasiliy Golubayev zavod hududida uchar qurilmalar bo‘laklari topilganini tasdiqladi. Zavod faoliyati to‘xtatildi. Surishtiruv tadbirlari olib borilmoqda.
Izoh (0)