Ijtimoiy tarmoqlarda Farg‘onada fuqarolar o‘rtasida katta janjal bo‘lgani aks etgan video tarqaldi. Mazkur holat yuzasidan Farg‘ona viloyat IIB axborot xizmati “Daryo”ga rasmiy ma’lumot berdi.
Ma’lum qilinishicha, 2022-yilning 13-may kuni Farg‘ona shahar Abdurahmon Jomiy ko‘chasi 16-uy 27-xonadonda yashovchi fuqaro M.A. 102 qisqa raqamiga murojaat qilib, unga tanish bo‘lgan F. va U. ismli fuqarolar uni urganligini aytib, qonuniy chora ko‘rishni so‘ragan.
Tergovga qadar tekshiruv davomida fuqaro M.A. o‘zining alabay itini ushbu ko‘p qavatli uyning orqa tarafiga bog‘lab qo‘yganligi, Farg‘ona shahar Ozodlik ko‘chasi 27-uyda yashovchi fuqaro S.S. bu holatga e’tiroz bildirganligi va oqibatda o‘rtada nizo kelib chiqqani aniqlangan. Og‘zaki tortishuv janjalga aylangan va S.S. M.A.ni urib, tan jarohati yetkazgan.
Ushbu ko‘p qavatli uyda yashovchi fuqarolar M.A. va S.S. o‘rtasidagi janjalning oldini olishga harakat qilgan.
Mazkur holat yuzasidan M.A.ga nisbatan Ma’muriy javobgarlik to‘g‘risidagi kodeksning 183-modda (mayda bezorilik) va 41-moddasi (haqorat qilish) bilan, fuqaro I.R.ga nisbatan 41-modda va 183-moddalari bilan, fuqaro S.S.ga nisbatan 41-moddasi va 52-moddasi 2-qismi hamda 183-moddasi bilan, fuqaro F.S.ga nisbatan esa 183-moddasi bilan hujjatlar rasmiylashtirib, joriy yilning 24 may kuni jinoyat ishlari bo‘yicha Farg‘ona shahar sudiga yuborilgan.
Fuqaro M.A.ning murojaatiga asosan JIB Farg‘ona shahar sudi tomonidan ushbu hujjatlar o‘rganib chiqish uchun Farg‘ona shahar prokuraturasiga yuborilgan.
Izoh (0)