O‘zbekistonda yangi Konstitutsiya qabul qilingach, hamma qatori amaldagi prezident Shavkat Mirziyoyevga ham saylovlarda qatnashish imkoni yaratib beriladi. Bu haqda Oliy Majlis Senati raisining birinchi o‘rinbosari Sodiq Safoyev “Kun.uz” muxbiri bilan suhbatda ma’lum qildi.
Qayd etilishicha, muxbir Senat raisi birinchi o‘rinbosarining asosiy qomusga o‘zgartirishlar kiritishdan asosiy maqsad prezident vakolat muddatlarini uzaytirish ekani haqidagi gaplarga munosabati bilan qiziqqan. Safoyevning aytishicha, yangi Konstitutsiya qabul qilinsa, u barcha fuqarolar uchun, shu jumladan hoziri prezident uchun ham saylovlarda ishtirok etishga imkoniyat yaratib beradi — “bu – xalqaro tajriba”.
Prezidentimiz bu imkoniyat va huquqdan foydalanadimi, foydalanmaydimi, bu birinchi navbatda ushbu shaxsga havola. Bu shaxsni ko‘rsatadigan siyosiy partiyaga havola. Lekin bu haq-huquq u kishida bo‘ladi.
Shaxsan, mening fikrimni so‘rasangiz, tajribadan kelib chiqib va xalqaro vaziyatni tahlil qilgan inson sifatida shuni aytishim kerakki, bugun biz bir nihoyatda tahlikali dunyoda yashayapmiz. Lekin shunga qaramasdan, biz islohotlarni davom ettirishimiz kerak. Men aminmanki, bu islohotlarni boshlagan insonda uni oxirigacha yetkazishga imkoniyat bo‘lishi kerak. Buni men kim bilan xohlasangiz va qayerda xohlasangiz bahs qilishim mumkin.
Biz hammamiz so‘nggi besh yilda shuni ko‘rdikki, davlat rahbari, prezidentimiz Shavkat Miromonovich Mirziyoyev qandaydir hokimiyatga tish-tirnog‘i bilan yopishib olgan siyosatchi emas. Ko‘rib turibmiz, u kishi el-yurt va vatan uchun xizmat qilishga bel bog‘lagan, o‘z umrini bag‘ishlagan inson. Ko‘rib turibmizki, xalqimizning og‘irini yengil qilish, birini ikki qilish, kelajagini ta’minlash uchun qanchalik harakat qilyapti.
Yana bir bor aytmoqchiman, basharti yangi Konstitutsiya qabul qiladigan bo‘lsak, bu biz uchun yangi imkoniyatlar yaratadi. Islohotlarimiz va olib borilayotgan siyosatlarimizni davomiyligi va izchilligini ta’minlash biz uchun muhim masala. Bu esa prezident Shavkat Miromonovich Mirziyoyevning nomi bilan bog‘liq. U kishi qanday qaror qabul qiladilar, bilmayman, shaxsan men shu davomiylikni ta’minlashning tarafdoriman”, — degan Sodiq Safoyev.
Izoh (0)