Tayson Fyuri Mayk Tayson, Lennoks Lyuis va Dueyn Jonson bilan jang qilmoqchi

Og‘ir vazn toifasida WBC chempioni Tayson Fyuri boks afsonalari va Gollivud yulduzlari bilan ko‘rgazmali janglar tashkil qilish niyati borligini aytib o‘tdi.

Bu haqiqiy jang bo‘lmay, balki ko‘ngilochar tomoshadek bo‘ladi. Professional boks emas, sof Gollivud uslubidagi o‘yin-kulgi.

Ko‘rgazmali jangda o‘tmishdagi bokschilar, taniqli shaxslar va umuman istalgan shaxs bilan kurashish mumkin. Uning odatiy janglardan farqi siz g‘alaba qozonish yoki mag‘lub bo‘lish uchun emas, shunchaki ko‘ngilxushlik, vaqtni maroqli o‘tkazish va muxlislarga shou ko‘rsatish uchun ringga ko‘tarilasiz.

Men Mayk Tayson, Lennoks Lyuis, Frenk Bruno, Dueyn Jonson bilan jang qilmoqchiman. Bu fantastik hodisa bo‘lardi. Bunday shoularda kim bilan jang qilishingni bilmaysan, ammo yaqin kelajakda buni amalga oshirishga umid qilaman.

Tayson Fyuri, bokschi

Tayson Fyuri boksdagi so‘nggi jangini Dillian Uaytga qarshi o‘tkazib, 6-raundda raqibini chuqur nokaut holatiga tushirib qo‘ygandi. Undan avval britaniyalik bokschi faoliyatini yakunlashi haqida ma’lum qilgandi.