Ijtimoiy tarmoqlarda Namangan viloyatining Kosonsoy tumanidagi “Yertikon” suv ombori to‘g‘oni ostidan suv sizib chiqayotgani haqida xabarlar tarqaldi. “Daryo” muxbiri Azizbek Abduvaliyev mazkur suv omboriga borib, hodisa tafsilotlarini o‘rgandi.
Suv omboriga borganimizda viloyat FVB boshlig‘ining o‘rinbosari, podpolkovnik Dilmurod Abdurahmanov va boshqarmaning bir guruh xodimlarini uchratdik. Abdurahmanov buni ushbu suv omborida mutaxassislardan iborat uzluksiz ishlovchi kuzatuv posti tashkil etilgani bilan izohladi.
“Joriy yil 13-iyun kuni boshqarma navbatchilik qismiga Kosonsoydagi suv omboridan suv sizayotganligi haqida xabar kelib tushdi. Boshqarma boshlig‘i, general-mayor Qosimali Ahmedov boshchiligidagi ishchi guruh zudlik bilan voqea joyiga yetib bordi. Hozirda FVB xodimlari, suv xo‘jaligi mutaxassislaridan iborat mazkur ishchi guruh suv sizishining kelib chiqish sabablarini o‘rganib, kamchiliklarni bartaraf etish choralarini ko‘rmoqda. ‘Yertikon’ suv ombori 20 million kub suv saqlashga mo‘ljallangan, holat aniqlangan kun suv omborida 3,6 million kub suv bo‘lgan. Ya’ni suv ombori beshdan biriga ham to‘lmagan. Hozir bu yerga suv kiritish ishlari to‘xtatilgan, to‘plangan suv ekin maydonlarini sug‘orishga chiqarilyapti. Shundan keyin suv sizishi ham deyarli to‘xtadi. Hozir omborda 3,2 million kub atrofida suv qoldi. To‘g‘onda yoriq yoki darz ketgan joylar kuzatilmadi”, — deydi Dilmurod Abdurahmonov.
Ma’lumot uchun, “Yertikon” suv ombori 1991-yilda foydalanishga topshirilgan va dastlab 12,4 million kub suv sig‘imiga mo‘ljallangan. Kosonsoy tumanida suv tanqisligini oldini olish maqsadida 2017-yili suv ombori sig‘imini 20 million kubga yetkazish bo‘yicha yangi loyiha tayyorlangan va 2017—2019-yillarda qurilish ishlari olib borilgan. Suv ombori to‘g‘onining uzunligi 1028 metr, eni 150 metr, balandligi esa 32 metr.
Suv ombori boshlig‘i Zohidjon Ahmedovning aytishicha, 2022-yildan boshlab ombor quvvatini loyihada ko‘rsatilgan darajaga olib chiqish maqsadida suv to‘plash ishlari boshlangan. Dastlab suv sig‘imi 420 ming kubdan 2 millionga, so‘ng 3 millionga yetkazilgan. Sig‘im 3,6 million kubga yetganida omborning suv chiqarish inshooti tomonida suv sizishi holati kuzatilgan. Shundan so‘ng omborga suv kiritish to‘xtatilgan.
Zohidjon bilan suv sizishi kuzatilgan hududga o‘tdik. Suv chiqarish inshooti yonida miltillab chiqib turgan suv tomchilariga ko‘zimiz tushdi. Ularni bir o‘zanga solish uchun ilonizi ko‘rinishida chuqurcha ham kovlab qo‘yilgandi.
Foto: “Daryo” / Jahongir Akramov
“Ko‘rib turibsiz, sizayotgan suv xavotir oladigan darajada emas. O‘zanning oxiriga borib, suv to‘plangan joyni o‘lchasak, 6 soniyada bir litr suv chiqyapti. Qolaversa, sizayotgan suv ham tiniq holatda. Loyqa bo‘lganida xavotirga tushsa arzirdi. Hududda aholi xonadonlari yo‘q, atrof bog‘ va ekin-tikin maydonlaridan iborat. Ko‘ngilni to‘q qiladigan jihati shundaki, to‘g‘onimiz juda mustahkam — oldi qismi membranali va betonlangan. 24 ta pyezometr qurilmamiz bor, ularning yordamida suv bosimi va namlik darajasini kuzatib borishimiz mumkin”, — deydi Zohidjon Ahmedov.
“Yertikon” suv omboriga safarimiz davomida bizga hamrohlik qilgan Norin-Sirdaryo irrigatsiya tizimlari havza boshqarmasi axborot xizmati rahbari Ilhomjon Qosimovning qayd etishicha, soha xodimlari Sardoba suv omboridagi yuz bergan holatdan kerakli xulosa chiqargan va hushyorlikni oshirgan.
“Namanganda jami 8 ta suv ombori bor va ularning holati har chorakda mutaxassislar tomonidan kamida ikki marotaba tekshiriladi. Tekshiruv davomida aniqlangan kamchiliklar zudlik bilan bartaraf etishga qaratiladi. Kosonsoydagi suv omborida kuzatilgan holat bu boradagi sergaklikni susaytirilmagani ayni muddao bo‘lganini ko‘rsatmoqda”, — deydi Ilhomjon Qosimov.
“Yertikon” suv ombori ombori boshlig‘i Zohidjon Ahmedovning bildirishicha, ombordan suv chiqarish to‘liq to‘xtab, suv sig‘imi dastlabki holatiga qaytganidan so‘ng hududdagi suv sizayotgan joylar aniqlanib, yuqori bosim ostida sementlash ishlari olib boriladi. Muammo qolmaganiga uzil-kesil ishonch hosil qilinganidan keyingina suv omboriga yana suv to‘plash ishlari boshlanadi.
Izoh (0)