MIB Uychi tuman bo‘limi ish yurituviga umumiy qiymati 228 million so‘m bo‘lgan chilim tayyorlashda hid beruvchi mahsulot bilan bog‘liq hujjatlar kelib tushdi. Bu haqda “Daryo” muxbiri Azizbek Abduvaliyev xabar bermoqda.
Ma’lum bo‘lishicha, mazkur mahsulot joriy yilning 2-fevral kuni ikki nafar fuqaro tomonidan Isuzu rusumli avtomashinada Toshkentga olib ketilayotganda huquqni muhofaza qilish idoralari xodimlari tomonidan to‘xtatib qolingan. Olib borilgan tezkor surishtiruvlar davomida hech qanday hujjatlari bo‘lmagan mahsulot noma’lum shaxsdan sotib olingani aniqlangan.
Sanitariya-epidemiologik osoyishtalik va jamoat salomatligi xizmati Namangan viloyat boshqarmasining xulosasida jami 598 dona idishdagi mahsulot xorijda ishlab chiqarilgani, muvofiqlik sertifikati yo‘qligi sababli realizatsiyaga ruxsat etilmasligi ko‘rsatilgan. Ushbu holat bo‘lib o‘tgan sud jarayonida dalil-isbotini topib, qonunbuzarlarga nisbatan tegishli jazo tayinlangan.
MIB Uychi tuman bo‘limi ish yurituviga kelib tushgan mazkur hujjat ijrosini ta’minlash maqsadida tadbir tashkil etildi. Tegishli mutaxassislar ishtirokida mahsulot yana bir bor sanoqdan o‘tkazilib, Uychi tumanidagi markaziy chiqindixonada belgilangan tartibda yo‘q qilindi va amalda ijro hujjati tamomlandi.
Izoh (0)