U-23 Osiyo Kubogi—2022 yarim finalida O‘zbekiston terma jamoasi Yaponiyani mag‘lubiyatga uchratdi. “Bunyodkor” stadionida o‘tgan o‘yinda Temur Kapadze shogirdlari 2:0 hisobidagi g‘alabani qo‘lga kiritdi.
O‘yindan keyin yaponiyalik futbolchilar o‘zlari foydalangan kiyinish xonasini tozalab ketdi.
“Yaponiyaliklar jahon futboliga eksport qilgan eng yaxshi fazilatlardan biri bu so‘zsiz farosatdir”, — deydi surat ostida qoldirgan PFL bosh direktori Diyor Imomxo‘jayev.
Qayd etish kerak, bu yaponiyalik futbolchilar va kun chiqar yurt muxlislarining “tashrif qog‘ozi”ga aylanib ulgurgan odat. 2018-yilgi Jahon Chempionatida nafaqat yaponiyalik futbolchilar, balki ishqibozlar ham har bir o‘yindan keyin tribunalarni axlatlardan tozalab ketgandi.
So‘nggi vaqtlarda O‘zbekiston terma jamoalari va klublari ham mehmondagi o‘yinlar vaqtida kiyinish xonasini toza holga keltirgan holda, mezbon jamoaga minnatdorchilik bildirib ketishni odat tusiga aylantirdi.
Eslatib o‘tamiz, O‘zbekiston va Yaponiya U-23 terma jamoalari o‘rtasidagi o‘yin o‘zbekistonlik tomoshabinlarsiz o‘tkazildi. O‘zbekistonning chorak final doirasidagi Iroqqa qarshi o‘yinida tomoshabinlar tomonida maydonga turli qattiq jismlar uloqtirilgani oqibatida OFK mezbonlarning yarim finaldagi o‘yinini mahalliy tomoshabinlarsiz o‘tkazish qarorini qabul qilgan va O‘FAni 50 ming dollar miqdorida jarimaga tortgandi.
Izoh (0)