Prezident qarori bilan Is’hoqxon Ibrat nomidagi Namangan davlat chet tillari instituti tashkil etildi. Bu haqda Telegram’dagi “Huquqiy axborot” kanali xabar berdi.
Qarorga muvofiq, Institut yuridik shaxs maqomiga ega davlat OTM hisoblanadi. Institutda o‘quv jarayoni 2022/2023-o‘quv yilidan boshlanadi.
2023/2024-o‘quv yilidan institutning bakalavriat ta’lim yo‘nalishlariga kirish imtihonlarida fanlar majmuasidagi chet tili fanidan 4 ta ko‘nikmani (tinglab tushunish, o‘qish, yozish va gapirish) baholashga qaratilgan kasbiy (ijodiy) imtihon o‘tkaziladi. Bunda:
- chet tili fanidan kasbiy (ijodiy) imtihon DTM tomonidan amalga oshiriladi;
- chet tili bo‘yicha B2 va undan yuqori darajadagi milliy yoki unga tenglashtirilgan xalqaro tan olingan sertifikatga ega abituriyentlarga ushbu fandan o‘qishga kirish sinovlarida kasbiy (ijodiy) imtihonsiz maksimal ball beriladi.
Institutning xorijiy tilda mutaxassislik fanlaridan dars beradigan C1 darajadan kam bo‘lmagan milliy yoki unga tenglashtirilgan xalqaro tan olingan sertifikatga ega o‘qituvchilariga ularning bazaviy lavozim maoshiga nisbatan har oylik 50 foiz miqdorida qo‘shimcha ustama haqi to‘lab boriladi.
2023/2024-o‘quv yilidan institutning xorijiy tillar o‘qituvchilari C1 darajadan kam bo‘lmagan, 2024/2025-o‘quv yilidan esa mutaxassislik fanlari (xorijiy tildan tashqari) o‘qituvchilarining B2 darajadan kam bo‘lmagan milliy yoki unga tenglashtirilgan xalqaro tan olingan sertifikatga ega bo‘lishi ta’minlanadi.
Institutga boshqa hududlardan jalb etilgan professor-o‘qituvchilar uchun uy-joy ijarasi to‘lovini kompensatsiya qilishga ruxsat etiladi.
Bundan oldin, O‘zbekistonda IT-park universiteti ochilishi, Toshkentda Yaponiya raqamli universiteti tashkil etilishi, poytaxtda Sankt-Peterburg davlat universiteti filiali ochilishi haqida xabar berilgan edi.
Izoh (0)