Ijtimoiy tarmoqlarda Toshkent metropolitenining poyezdi bir necha daqiqaga to‘xtab qolgani aytilayotgan xabarlar tarqaldi. “Toshkent metropoliteni” davlat unitar korxonasi holatga izoh berdi.
Ma’lum qilinishicha, “Chilonzor” yo‘nalishida harakatlanib kelayotgan poyezd soat 10:50 lar atrofida elektr ta’minotidagi qisqa nosozlik sabab “Olmazor” bekatida to‘xtagan. Yo‘lovchilar esa bekatdan chiqarilgan.
Shu sabab “Chilonzor” yo‘nalishining qolgan bekatlarida ham poyezdlar harakati belgilangan reja jadvalidan o‘zgargan holda bir tomonlama va kichik halqa jadvali asosida harakatlangan.
“Holat yuzasidan mutasaddilar tomonidan bir qator ishlar amalga oshirilganidan so‘ng soat 11:58 da nosozlik bartaraf etilib, poyezdlar doimiy jadval asosida harakatlanmoqda”, — deyiladi xabarda.
Eslatib o‘tamiz, 7-aprel kuni Toshkent metro poyezdi “Paxtakor” bekatida to‘xtab qolgan, 5-fevral kuni “Xalqlar do‘stligi” va “Milliy bog‘” bekatlari oralig‘ida harakatlanib kelayotgan 4-sonli harakat tarkibida texnik nosozlik kuzatilgan va poyezd harakatdan to‘xtagan, 6-fevral kuni esa metro poyezdi “Mustaqillik maydoni” bekatida to‘xtab qolgan edi.
Izoh (0)