“Real”da dastlabki transfer: Antonio Ryudiger “Chelsi”ni tark etib, Madridga ko‘chib o‘tdi

“Chelsi”ning sobiq futbolchisi Antonio Ryudiger erkin agent sifatida “Real” safiga qo‘shildi.

Madrid jamoasi markaziy himoyachi bilan kelishuvga erishganini ma’lum qildi. Ryudiger “qaymoqranglilar” bilan 2026-yilning yoziga qadar mo‘ljallangan shartnoma imzoladi.

Antonio faoliyati davomida “Shtutgart”, “Roma” kabi jamoalarda to‘p surgan. 2017—2022-yillar davomida “Chelsi” sharafini himoya qilgan. Londonliklar safida 203 ta o‘yinda ishtirok etib, 12 ta golga mualliflik qilgan. Nemis futbolchisi “aristokratlar” bilan Chempionlar Ligasi, Yevropa Ligasi, Angliya Kubogi, Yevropa Superkubogi va klublar o‘rtasidagi Jahon chempionati sovrinlarini qo‘lga kiritgan.

29 yoshli himoyachi 2021/22-yilgi mavsum “Chelsi” safida barcha musobaqalarda 48 ta o‘yinda ishtirok etib, 5 ta gol va 2 ta golli uzatmani amalga oshirdi.

Avvalroq Marselo, Isko va Garet Beyl “Real”ni erkin agent sifatida tark etayotgani ma’lum qilingandi.