Amerikaning RedBird Capital Partners investitsiya kompaniyasi Elliott Management Corporation bilan “Milan” klubini sotib olish bo‘yicha kelishuvga erishdi.
Bu haqida “rossonerilar” rasmiy sayti ma’lum qildi. Bitim 1,2 milliard yevroga baholangan. Shu bilan birga Elliott klubdagi kichik manfaatlarini va direktorlar kengashidagi o‘rnini saqlab qoladi.
Klub xo‘jayinining almashish jarayoni yozda yakunlanish va sentabr oyiga qadar esa shartnoma ishlarini tugatish rejalashtirilmoqda.
RedBird Capital Partners — “Liverpul” futbol klubi va “Boston Red Soks” beysbol klubiga egalik qiluvchi Fenway Sports Group kompaniyasiga investor hisoblanadi. Shuningdek, RedBird “Tuluza” aksiyalarining nazorat paketiga ham egalik qiladi.
Ma’lumot uchun, Silvio Berluskoni “Milan”dagi 31 yillik boshqaruvdan so‘ng jamoani 2017-yilda xitoyliklarga tegishli Rossoneri Sport Investment Lux kompaniyasiga sotib yuborgandi. 2018-yilda jamoaning sobiq xo‘jayini Li Yunhun kredit qarzdorligidan chiqa olmagach, Milan shahri jamoasi amerikaliklarga tegishli Elliott Management Corporation investitsion fondiga o‘tib ketgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)